星級父母交換湊仔經 楊思琦教女大忌起弶鬥失控
電視台ViuTV熱播的真人實況娛樂節目深受觀眾追捧，全新製作的《超級奶爸》以真人騷形式，貼身紀錄七個來自不同背景的家庭個案，更有圈中星級父母分享育兒心得。楊思琦自爆女兒曾在學校情緒失控，因而大叫大嚷；林子聰則認為父母的身教最重要，更為了兒子好幾次流下男兒淚。
《超級奶爸》由家長及幼兒教育課程導師何基佑擔任主持，以真實個案呈現父母經常遇到的子女行為問題，拍攝各父母由面對頑皮孩子時束手無策，變成在「超級奶爸」幫助下，以不打不罵的方式，學懂運用正確管教方法的整個過程。節目中，何基佑碌盡人情卡，邀請圈中一班星級父母，包括楊思琦、蔣怡、林子聰、高皓正、歐倩怡及郭羨妮分享湊仔經。
歐倩怡怕各有一套
身為單親媽媽的楊思琦，節目中耐心地教小朋友摺飛機，談及管教問題，她說：「管教嘅關鍵好睇小朋友本身嘅性格，好似我個女咁，佢好好動，但試過因為唔識管理情緒，喺學校大吵大鬧，通常要等佢冷靜咗先，唔可以佢叫，我又一齊大叫，將個氣氛拉到好激烈，佢係唔會聽你。喺呢個時候，又唔可以責備佢，唔好用鬧嘅語氣，或者負面嘅字眼，要針對咗嗰件事先，了解咗再慢慢教。」
而歐倩怡覺得成屋大人，反而更難教小朋友，雖然有公公婆婆、爺爺嫲嫲幫手，但愈多人愈難搞，因為各人管教方式經常有分歧：「個個準則都唔同，搞到囝囝、囡囡無所適從，所以大人之間商量好係好重要。」歐倩怡指兒子年約9、10歲，開始踏入另一個較難管教的階段：「點樣話畀佢聽，一啲嘢唔適合佢呢個年紀做，或者應該去做？」她坦言兒子現在較愛黐爸爸，會模仿爸爸做男人的模式，即使向他說教，他亦未必會聽：「男仔6歲以下會親媽媽多啲，6歲以上開始搵人模仿，同輩嘅影響都好大，所以要小心教導。」
林子聰提起囝囝喊出嚟！
至於林子聰在節目中跟囝囝玩啪啪紙，場面溫馨，他認為父母要以身作則：「樣樣嘢都要提住佢，因為佢哋一定冇記性，要Keep住提啲啱嘅嘢，好似禮貌咁，一定要潛移默化。」談到囝囝時，子聰一度哽咽，坦言曾經為囝囝喊過幾次，第一次是親眼在產房睇住他出世：「嗰種震撼真係未試過。」另一次則是平日愛說話和笑的囝囝患上咽喉炎，因而聲沙失聲，令他很心噏。問到對兒子的將來有何寄望？他說：「希望佢做個平凡人，愈平凡愈好，個人愈開心！」
文：音樂組
《超級奶爸》
播放時間：11月12日起逢星期日晚上10時30分 ViuTV 99台