開腦昏迷粉絲甦醒學寫偶像名 千嬅收信喊到癲

千嬅將於年底假紅館舉行聖誕及跨年演唱會，忙於綵排的她，前晚出席個唱前熱身的音樂會，除了父母、弟弟及老公丁子高支持外，還吸引歌手林欣彤、組合Super Girls成員Jessica及Yanny、蘇麗珊及填詞人林夕等捧場，並請來王菀之、吳業坤、陳柏宇、C AllStar成員On仔及顏卓靈等人任嘉賓。尾聲時，工作人員遞上一封信給千嬅，接過手的她一臉愕然地讀出，期間數度淚流滿面如決堤，更要抖大氣讓自己冷靜。

讀前全不知情

信件是由千嬅一名荷蘭歌迷GiGi的母親所寫，當中提到愛女GiGi早年做開腦手術但不幸失敗，還陷入昏迷，直至月前奇迹甦醒！GiGi接下來接受物理治療及重新學習寫字。說到此時，千嬅已口震震及不停擰頭，吸了一口氣才繼續讀出：「GiGi學寫字第一筆唔係寫自己名，而係寫楊千嬅。」感動內容擊中千嬅死穴，她說：「點解綵排時唔攞出嚟？完騷先畀我睇！」由於太觸動人心，全場歌迷都被感動得眼濕濕，工作人員見千嬅喊到收唔到掣，急急遞上紙巾，最後千嬅再深呼吸祝福對方說：「祝你早日康復，GiGi。」

千嬅讀信時一字一淚，要拭淚及深呼吸才能讀下去。	工作人員突然遞上信件，千嬅坦言事前不知情。	千嬅讀出的來信中，附有昏迷後醒番的粉絲學寫「楊千嬅」的字條。

拍片鼓勵對方

事後，千嬅坦言不知道會收到歌迷信件：「呢位歌迷媽咪寫封信去電台，都係啱啱先知。（回信？）會錄一條片畀佢睇，因為做完開腦手術對影像會好啲。（信件好催淚？）直情喊到癲同呆啦！每個人都有自己故事，係一種緣分，不過都幾感人。」並透露一直忍住眼淚：「其實成個騷嘅歌曲好感慨同感人，每首歌都有廿幾年，老過屋企啲陳皮。」提到現場有名小演員，問到為何不叫囝囝Torres演出？千嬅說：「Torres發燒，不過原本都唔係佢做。」對於李克勤有意送兒子入軍校學獨立，她指不同父母的教導都不一樣：「我好放手畀個仔自己做，最緊要識解決問題。」

催淚奇迹！	On仔與顏卓靈擔任嘉賓兼扮情侶結婚。	小演員講錯台詞叫千嬅「滾」，搞到她忍不住笑。

另外，千嬅昨晚錄影電台節目時表示，前晚騷後收到歌迷消息：「有歌迷話識GiGi，亦都將我讀信呢Part拍低同Send咗畀佢。（知唔知點解要做開腦手術？）唔知，呢個係佢嘅私隱，會透過公司攞佢聯絡，拍條鼓勵片，我喊係因為抱媽咪角度睇呢件事，好感動。」

文：音樂組