Jimin肩頸痛禁舞眼濕濕道歉

防彈少年團（BTS）前晚假澳門威尼斯人金光綜藝館舉行演唱會，為今次世界巡迴演唱會的最後一站。所屬的Big Hit事務所事先宣布成員Jimin因前往澳門時感到頸痛及膊頭痛，抵達澳門後已到醫院求診，而他全程沒有參與舞蹈演出，只坐在櫈上或在舞台邊站着完成演出。

取消Solo

演唱會準時在8點開始，7子以《Not Today》一曲揭開序幕，Jimin坐在後面的升降台，其餘成員則在台前大跳勁舞。7子逐一用廣東話自我介紹後，便唱出新歌《GOGO》及《DOPE》。而成員先後唱出Solo曲，但Jimin的Solo曲《Lie》則因為有激烈舞蹈而取消。之後七子一連唱出多首Hit歌，包括出道歌《N.O》、《No More Dream》及《Run》等，並唱出新歌《DNA》及人氣歌曲《Blood Sweat & Tears》。

他們在Encore部分逐一晒廣東話冧粉絲，Jungkook用標準廣東話說：「我想成日同你哋見面呀，雖然你哋隔得好遠，但係都唔好唔記得我哋呀，多謝你哋，我真係好幸福呀！」J-Hope又以廣東話賣口乖：「咁多位澳門Army（BTS粉絲名稱），多謝你哋，你哋係我哋對翼，多得你哋我好似識飛咁，我哋一齊再飛高啲啦！」

隊友安慰

而Jimin談到因傷而未能跳舞時一度眼濕濕，他用韓語向粉絲道歉：「我真係好對唔住大家，我知道有好多人一直都等緊今日，今日唔能夠畀到最完美同最有趣嘅演出畀大家，真係好可惜！下次再嚟澳門，一定唔會再發生咁樣嘅事！」而Rap Monster不忘安慰Jimin：「Jimin今日真係做得好好，大家話係唔係呀？」Jimin又多次表示自己已經沒有大礙，叫大家不用擔心。而成員Jin最後展示他準備的紙心心，七子之後再唱出《Spring Day》，為演唱會作結。

另外，今年5月在美國《Billboard音樂獎》獲封「最佳社交媒體歌手」的BTS，近日落實將赴美參加《美國音樂頒獎禮》，演唱新歌《DNA》。

文：外娛組