劉佩玥座駕捱撞傷痕纍纍
藝人劉佩玥前日出席活動後趕往為新劇開工，搞到要捱麵包頂肚！現場見其座駕「傷痕纍纍」，她笑言因經常捱撞，搞到車身冇忽好肉。
無綫小花劉佩玥（Moon）劇接劇忙個不停，前日她出席《降魔的》宣傳活動後，即駕車趕往大埔科學園為新劇《堅離地愛堅離地》拍外景，忙到連飯都冇時間食，隨手買兩個麵包頂肚。問到為何白色寶馬座駕車身又凹又花？她說：「畀人撞又有，有時自己唔小心撞到！之前畀架貨車Hit and Run揩到走咗，自己又冇裝車Cam，追究唔到。」
龔嘉欣搵小演員教打機
之後Moon會合同劇的龔嘉欣（Katy）、康華及一名小演員再開工，拍攝前Katy細心地跟小演員對劇本，現場所見，Moon、Katy跟小演員拍攝對手戲時相當合拍，不用埋位時，三人齊齊研究手機遊戲，Katy更拎埋電話向小演員「請教」。事後Katy說：「劇裏面我要打機，所以要練吓。（玩咩Game？）《傳說對決》，個小朋友好勁o架，我畀埋電話佢幫我打，佢仲幫我升Level添！」
文、攝：追蹤組