吳業坤滴住汗認臭：冇得救！
藝人吳業坤早前被指拜狐仙改運，雖然已作澄清，但昨日出席宣傳活動仍被拍檔歐陽震華及田蕊妮「雙劍合璧」大開玩笑，揶揄他大汗有異味「成仙」。難得吳業坤不怒反笑，又作勢舉高手讓拍檔聞「仙氣」！
歐陽震華（Bobby）、田蕊妮、陳豪、李佳芯與吳業坤等昨午出席無綫台慶劇《誇世代》宣傳，被懷疑拜狐仙改運的吳業坤甫出現即成被玩對象，Bobby與阿田拍住搞Gag，Bobby先開玩笑：「狐仙邊係拜o架？要嚟聞嘅！」阿田則抵死投訴吳業坤大汗難頂，又向台下粉絲說：「邊個想要吳業坤抹過汗嘅手巾？」被封「狐仙」的吳業坤聞言未有黑面，玩遊戲時更舉起手作勢讓拍檔余德丞「聞氣」！
阿田與吳業坤事後齊齊受訪，阿田繼續笑對方：「同佢由《迷》拍到嚟《誇世代》，拍劇唔辛苦，係啲拍檔難頂，我放長假係要呼吸新鮮空氣！」在旁的吳業坤除帽後被發現大汗叠細汗，他靦腆地說：「我真係好大汗，冇得救！細個返學啲同學仔肯同我玩，但玩完又話我臭！」阿田即「安慰」他：「唔玩你喇！係大汗啲啫，冇臭喎！」
李佳芯忍痛谷戲
身為無綫收視福將的Bobby被問到對《誇》劇的收視是否有壓力，他說：「依家幾點先叫高？（28點都好好！）我以前拍《陀槍師姐》有50幾點喎！依家多咗好多渠道追劇，計算同以前有分別，我有壓力o架！但份人就一世夠運。（最夠運係娶到好老婆？）係！我老婆吼住我副身家先嫁我！唔係我有錢，係有內涵、心地好！」
剛接受完婦科手術的李佳芯日前穿高跟鞋出席節目巡禮後，身體即有不適，她說：「我唔知道手術後唔着得高踭鞋，嗰日我見有位都坐吓，點知都係攰同開始痛。休息完好啲，唔想缺席今日活動。」
文：影視組