感觸「廢柴」往事 夫妻同患抑鬱 張繼聰：害我嘅人都係菩薩

張繼聰在社交網上載和太太謝安琪（Kay）於7年前齊出席叱咤樂壇頒獎禮的舊片，台下「食白果」的他，聽着上台攞「叱咤樂壇女歌手銀獎」的Kay喊住發表謝詞時，他也偷偷抹淚。他撰文自爆當時正深受抑鬱折騰：「當時我嘅抑鬱病非常嚴重，片中所見嘅我，其實當時食行藥，所以好口乾、好頭暈、好攰，同時又好感動，好替太太開心，好想抱住佢，再同時好驚好怕，好擔心食白果嘅我唔知又會畀人點嘲笑。」他更透露台上的Kay病情不比他輕：「太太成晚雖然得到好多個獎，其實當時嘅佢抑鬱病都好猛烈，承受好大嘅壓力，佢都係考緊宇宙畀佢嘅試……你話世界係幾奧妙？」阿聰這篇「千字文」一出，至昨晚8時半已有2萬人畀Like。

盡量搞笑冧妻

昨日阿聰受訪時，指甫文時內心曾掙扎過：「有諗過好唔好講，但諗諗吓，那怕只有一個人咁啱睇到，對佢有啲安慰都好值得。」阿聰重提當年被肆意抨擊，感覺如被迫到死路，但之後又感激上了這次催化他成長的人生課堂，更多謝曾看不起他的人：「其實佢哋都係我老師，如果一個人好安逸，就唔會去諗其實人生係點，佢哋全部都係菩薩，甚至表面好似害我嘅人，佢哋令我成長咗。三十幾歲前有一段咁不平凡嘅經歷，學識好多嘢，幾抵！」

問太太可有被他的文章嚇一跳？阿聰表示太太沒被嚇到，又指和太太的經歷是上天注定：「大家都要經歷咁嘅嘢，係呢個對手，先有咁嘅劇情，係悲劇定喜劇大家努力去演，我覺得係喜劇，盡量搞搞笑笑，等個老婆開心。」

大讚發放正能量

而Kay在電話中表示阿聰已發表了長文，以老公為先的她也不回應太多，但可分享的是：「總之我哋依家生活得好開心啦，多謝好多充滿祝福嘅留言，同埋有好多朋友睇完篇長文後，有好多感受，有啲朋友都覺得支持到佢走一啲難關。」她又讚阿聰做得好，因可帶出正能量。

文：音樂組