富豪老公發最後通牒 林夏薇造人優先無限期停工
無綫花旦林夏薇結婚兩年多，一直想為老公莫贊生（Jason）繼後香燈，奈何事業心重的她仍未有所出，最近Jason終發出最後通牒，薇薇即乖乖就範宣布暫時息影，開行Turbo努力造人，並坐言起行黐實老公甜蜜出埠，展開造人大計，實行兩個去三個返！
現年30歲的林夏薇兩年多前秘嫁年長15歲、身家逾廿億的金融才俊莫贊生，隨即過住闊太生活，不過事業心重的她未有放慢腳步，更劇接劇忙到冇時停，結果愈捱愈瘦得條藤，令老公心痛非常。雖然曾以生B為由勸她減少工作，但薇薇見事業開始起飛，不欲毅然放棄機會。
未完約 無綫開綠燈
面對事業與家庭之間的抉擇，薇薇確實難以取捨，起初一直採拖字訣，引來老公有微言，故她惟有開始減產，每年僅接拍一至兩套劇，其餘時間做回太太本分，並開始睇中醫調理身體，惟二人作息時間未能協調，所以一直未有傳來喜訊，至近期Jason終按捺不住向薇薇發出最後通牒，薇薇思前想後終乖乖就範，決定暫時息影，配合老公的造人大計。雖然與無綫的合約尚有一段時間，但當獲悉薇薇的因由後亦願意開綠燈放行，故她完成之前接落的黃偉聲新劇《逆轉傳說》便閉關造人。
飛沖繩 晒誘人Body
為了製造造人機會，近日二人孖住到沖繩旅行，Jason帶備專業器材為薇薇充當攝影師影靚相，薇薇更把泳裝造型上載社交平台開心Share，獲網友激讚皮膚又白又滑兼身材Fit爆，穿一件頭泳衣絕對冇難度。而日前記者亦發現薇薇樂得輕鬆，撇下老公單拖現身中環，邊行邊講電話，並急步往附近街頭等車，及後在司機接載下趕返山頂愛巢慰夫，明顯與老公有晒默契。
本報就息影一事向薇薇求證，正於老公身邊的她聲線嬌嗲說：「拍劇係要停一停，未知停到幾時（口架）！（老公最開心？）咁生小朋友都一直有計劃嘅，只係時間問題，唔接劇可以多啲時間陪老公飛。（會唔會今次沖繩一擊即中？）呢啲係上天賜嘅禮物，有嘅話當然開心啦！」
文：影視組
攝：追蹤組