美國女星Elizabeth Olsen憑漫威超級英雄「紅女巫」一角，成為不少觀眾心中「性感女神」，她於新片中飾演聯邦密探調查一宗姦殺案，她自言拍完戲後更積極支援被性侵的受害人。
現年28歲的Elizabeth在新片中飾演聯邦密探，在冰天雪地中調查印第安女子被姦殺的案件。她受訪時表示拍攝時的酷寒天氣，令她難以適應：「我以前試過喺紐約租地方住，記得有次落六吋厚嘅雪，我要剷雪先開到車出去，我當時就諗自己頂唔到呢種天氣。」她又指飾演有自信的領導者角色並不合乎其性格，她為準備角色曾接受前警察與前軍人訓練：「冇咗佢哋我好難揣摩到應該點行路同講嘢。我亦接受槍械訓練，等我揸槍時望落專業啲。」
Elizabeth談到電影沒有歌頌暴力，尤其是強姦場面，現實中經常發生性罪行，她說：「我喺聖莫尼卡嘅強姦治療中心做義工，嗰度可能係性侵受害人喺美國有嘅最好設施。嗰度有個18歲以下區域，我就喺遊戲室度陪人玩。因為呢套戲，我決定更加積極參與，因為呢樣嘢唔會消失，性侵同強姦無處不在。」
作為童星孖女Ashley與Mary-Kate Olsen的妹妹，Elizabeth自小面對狗仔隊追訪：「我明白擔心自己畀人影相唔係一件正常嘅事，當你長大時，成日會畀班古怪男人喺洛杉磯揸車追住你。我因為咁好鄙視呢種人，亦好鄙視八卦雜誌。」
她已習慣面對私隱被侵犯，有次她低調乘飛機，落機時見到一個粉絲拿住她的照片索取簽名，她斷然拒絕，因她覺得該名粉絲竟然知道她的保密行程，有如跟蹤狂。另一次有粉絲在機場走近她，指她長得很像Elizabeth Olsen，她只是簡單回應：「好多人都咁講。」她為名氣更大的珍妮花羅倫絲（Jennifer Lawrence）感到難過，指自己情況已算不錯。
問到其地產商父親與前芭蕾舞蹈員母親，如何保護三姊妹在娛樂圈長大時，Elizabeth說：「佢哋完全唔熟悉電影業，所以佢哋請咗了解嘅人、同好多女人去睇住我哋。我知道好多做童星嘅人有過可怕經歷，我都聽過，但我諗我哋一家都係好公事公辦。Olsen家做事一向唔係為咗名氣同做明星。」她自言因為生於富貴之家，她要更加努力，才可以打破別人覺得她「離地」的印象。
雖然Elizabeth為人低調，但戀情不時成為娛樂焦點。她於2012年曾傳與《真愛如血》（True Blood）男星Alexander Skarsgård撻着，同年她與男模Boyd Holbrook拍拖，2014年訂婚，但翌年分手。
其後她曾與漫威電影世界兩個男星傳過緋聞，分別是「美國隊長」基斯伊雲斯（Chris Evans）與「邪神洛基」湯赫度斯頓（Tom Hiddleston）。今年2月，Elizabeth開始與唱作人Robbie Arnett相戀，直到現在。
文：外娛組