陳詩慧黐食黐住認衰女 雨僑冇娛樂恨做樓奴

雨：雨僑　陳：陳詩慧

凌晨創作騷擾家人

雨：近年自己搬咗出嚟，其實有屋企投靠係好舒服。但我成日要喺屋企拍嘢同做音樂，係幾騷擾。我想買樓，好多人話即係做「樓奴」，我依家都係「租奴」啦。除咗租屋住，仲要租Studio、網店同Office，另外又要租倉，一個月交五、六份租。試咗一年，我好想Group埋晒一齊，因為加加埋埋啲租都差唔多，咁交租落去都唔係辦法，但我知買樓都要好多犧牲！其實我好少去旅行，出Trip都係工作，冇乜娛樂，我又唔買衫同包包，如果決定將啲錢投資「磚頭」，就預咗生活上冇咁精彩。但好似Eva咁唔會預生命中將一大舊錢放喺「磚頭」度，佢情願享受咗生活。

陳：我都喺屋企做音樂，係騷擾嘅，但阿媽都冇我符，佢已經放棄。但阿媽又明白，冇理由屋企咁一流享受唔住，自己搬出去辛苦，我又唔係搵得多錢。依家屋企有Home Studio，凌晨3、4點做音樂咪閂好房門囉，阿媽都習慣咗，所以樓唔買啦，黐家住算。我預咗同阿媽一齊住到老，有錢我都留番嚟做音樂好過。

陳詩慧搞笑扮錫，雨僑嘟嘴配合。	雨僑坦言當年拍完《喜愛夜蒲3》後多了工作。	雨僑自嘲「租奴」，希望早日儲夠錢畀首期升呢「樓奴」。

轉闖影壇絕處逢生

雨：依家做音樂真係好矛盾，但一早同自己解釋咗，亦都唔記得點說服自己。我係創作歌手出身，有啲嘢唔使兜，大家都知做歌手真係好辛苦好慘，三更半夜做完首歌，第二朝起身仲點會係靚樣見人，如果係男人應該出晒鬚根添啦。最辛苦做首歌，得到嘅回報係零！我明白人生中唔係樣樣付出要攞得番，但呢樣嘢係零回報就好大鑊，因耗盡你好多時間。問我嘅話，我仲係鍾意做音樂嘅，仲會去做，但唔會投放晒時間，好似跳咗落海咁樣，回報係零，咁對自己人生都唔負責任，亦冇可能要屋企養咁衰嘅女。

雨僑指陳詩慧「諧口諧面」，兩女即忍唔住喪笑。

陳詩慧笑指屋企好食好住，唔介意一世做「黐家女」。

陳：我比較固執，係超級嗰種。我08年出道做新人，但之前已經係做緊幕後，投入咗廣東歌創作，對廣東歌有情意結。覺得好唔抵嘅係廣東話係本土語言，但依家現象係愈嚟愈少廣東歌，個個北上發展，我覺得廣東歌係值得保留嘅文化遺產。正如你話齋係掟錢落海咁，冇人聽啦，反而一隻「MK Pop」有幾百萬點擊，做一首正經嘅歌就得幾千個點擊，係氣餒o架！但氣餒嘅同時，又會想繼續做，做到有一刻冇辦法先放棄。而我哋好好彩係有其他嘢做，佢有美容同拍戲，我亦有拍戲，仲攝到位做電影配樂，變咗有得做番自己鍾意嘅嘢，係有種絕處逢生嘅感覺。

諧口諧面發掘潛能

雨：所以每件事都係有關連，嗰種回報可能唔係咁直接。嗰時拍完《喜愛夜蒲3》之後，真係多咗好多登台騷，好老實講，如果冇拍戲只唱歌，邊個會請你去拉斯維加斯？你係乜水？雖然我依家都係「乜水」，但至少形容到我係邊個，所以有啲嘢堅持住，兜個圈可以有意外收穫，拍戲帶挈唱歌係驚喜嘅。我計過條數做Singer Song Writer要太多時間，惟有放棄唔花太多時間去寫，有時真係幾（火羅），做歌手冇歌派，好似喺賭場賭錢，如果唔落注，咁呢鋪牌仲玩唔玩呢？所以我點都要落吓注先得。

陳：最驚喜係我首英文歌《I will be back》，嗰時諗真係做完首歌唔做，係完全唔做呢行，好彩蕭生（蕭定一）執咗我返去，重燃我希望，又畀我做歌同演戲。開心係你睇完首影，讚我係拍喜劇材料，係一個諧星嚟，我真係開心嘅，我都好滿足。因為我曾經諗過如果有機會拍電影都想做諧星，你哋見我都諧到上塊面啦。

雨：係呀，諧口諧面，哈哈哈！

文：音樂組

攝：秦健輝

髮型：Deep Yu@BEIJING Hair Culture

服裝：Noveltylane

化妝：J.Wong@Hello!J

髮型：Ben Leung@the mira PRIVATE i SALON

服裝：N12H

場地：THE BARBE