吳浩康諗結婚：希望係佢！
吳浩康事業經歷過高山低谷，有氣力走到現時這一步，坦言全靠家人及朋友陪伴，而女友李昭南亦是其中一位。他直言視女友為結婚對象，但笑言不會在12月的演唱會上求婚，因覺得這樣做有威逼成分！
入行15年的歌手吳浩康（Deep）事業重新啟動，相隔8年再出新歌《較早前錄影》，並在12月9至10日於九展開首個大型演唱會《吳浩康LISTEN TO DEEP LIVE 2017》。他坦言壓力大，心情緊張：「期望好大，會用最好狀態去做呢件事，但我好易覺得自己做得唔好，所以要花時間勸自己唔好諗咁多。」
跑步減壓
他坦言希望讓大家看到唱歌有進步，現時每周都會有兩至三日跑到九展：「激勵吓自己，以前覺得紅館勁啲，但依家睇番，歌手喺唔同階段、唔同場地開騷都會唔同，而且呢個騷都有幾多真摯嘅嘢。」
問到可會在個唱中與歌迷分享心路歷程，Deep指會事前透過報道或在網上發文分享，演唱會則只講將來。問到是否不願重提低潮？他坦言：「咁多年嚟我都唔介意提起，尤其是用喺幫到手嘅地方，例如探訪年輕人或分享嘅場合。（想證明畀大家睇已經同過去唔同？）係咪唔同咗要交畀同我相處過嘅人講，但冇特別諗，依家想好好做一件事。」
拍拖年多
定性不少的他，被問到是否受現任女友李昭南影響？Deep坦言生命中有很多人陪他走過低谷：「女朋友係其中一個，佢嘅出現對我有好多正面影響，無論係情緒定生活。」與女友拍拖一年多以來感情穩定，問到是否去到談婚論嫁的階段？他坦言：「未去到，太早講驚有變，但佢係一個好好嘅對象，希望可以係佢。」提到不少藝人在演唱會上求婚，問他會否送驚喜給女友？他笑言：「我諗唔係咁好，好似有少少威脅成分。（計劃幾年內結婚？）要睇番同另一半嘅狀況，最緊要大家一致。」
文：音樂組
場地：Massimo Meda Gallery（Hong Kong）
髮型：Moe Justin @Fifth
化妝：KeiKei Ng
服裝：5cm