張智霖自爆收狂迷血書示愛
型男張智霖昨日與韓星Yoon A出席品牌活動，視韓星宋慧喬及全智賢為偶像的他，自認是理智粉絲，看到她們幸福便感滿足，他又自爆曾收過狂迷送血書，慶幸進入電子時代，不用再收到恐怖信件。
韓國人氣女團少女時代成員Yoon A與藝人張智霖（Chilam）昨日為Salvatore Ferragamo廣東道旗艦店重新揭幕擔任嘉賓，吸引逾200粉絲圍觀。二人之後換上另一新裝現身金鐘舉行的品牌派對，同場還有台灣女星歐陽娜娜、藝人苟芸慧、名模樂基兒、周汶錡、Ana R.、Cara G.等，場面熱鬧。
Chilam表示是首次見到Yoon A，並自認跟韓星有緣，問到喜歡哪位韓星？他說：「我鍾意全智賢同宋慧喬，見到宋慧喬結婚好幸福，希望佢永遠幸福。其實鍾意一個偶像唔係要變成夢中情人，見到佢開心就好滿足。」他讚自己的粉絲對他非常支持及理智，不希望有狂迷諗埋一邊，扭曲了支持的定義。問到有否遇過狂迷？他說：「有，好似喺你屋企門口等幾日，用血寫信，不計其數，好在依家電子發達，唔會再有咁恐怖嘅嘢。」
做業主真係「供起」
提到早前以首次置業方式買入近億元豪宅，Chilam說：「首次以自己名義去買，以前係用公司名，唔好浪費咗首置嘅優惠。（好快到太太買？）希望有能力買，中國人傳統思想要有舊磚頭，生命好短暫，屋都係留畀小朋友，之後又唔知去咗邊，我睇得好淡，好多朋友知我買咗樓都恭喜我，我話真係開始要供，係『供起』。」
至於Yoon A昨晨約11時40分由首爾抵港，現場有30名粉絲接機，約十名保安維持秩序。身穿樽領毛衣及牛仔褲的她企定定向粉絲微笑揮手，表現親民。
文：名人組