麥明詩有情有義肯為林作上床

昨日「十優港姐」麥明詩出席無綫活動,對於舊愛林作日前指考慮找她影床照賺錢幫媽媽還債,麥明詩坦言為慈善或藝術的話可以,又指床照未必要性感。

無綫藝員麥明詩、陳智燊、宋熙年、張曦雯、馮盈盈、單文柔、歐陽巧瑩、陸浩明及趙希洛等昨日在將軍澳電視城出席「J2 X Pearl 2018節目大晒冷」推介新節目。對於網民指麥明詩近期行性感,她說:「唔係,因為卸任咗咁耐,藝人唔應該框住自己,『茉莉公主』造型係因為萬聖節先性感。」又笑言不要太多性感示人,怕會看膩。

講到舊愛林作指考慮找她影床照賺錢幫媽媽還債?麥明詩笑指床照不一定性感,為慈善或藝術也可以。問可會要求林作言論不要牽涉到她?麥明詩笑說:「我都有睇報道,佢只係答咗個中性答案,就變咗好似佢主動帶出呢個話題咁。出得嚟行,遲早要還,都係我講吓你,你又講吓我,唔會計較。」

張曦雯狂掃泳衣

以金色吊帶裙亮相的張曦雯透露,將會到澳洲第三度拍節目《3日2夜》,節目更「升呢」在翡翠台播放,她笑說:「依家已經買定多啲泳衣準備。」至於被指買情趣內衣氹緋聞男友陳展鵬的單文柔,則大呼冤枉:「係為活動揀適合嘅內衣,標題起得好核突,雜誌將幾日影埋嘅相砌埋一齊,我嗰日係同個女仔去買。」

文:影視組