舊愛浪迹情場 唐詩詠:最緊要開心

曾與崔建邦拍拖的唐詩詠,昨晚出席活動時被追問舊愛與林珊珊女兒李怡(野人)分手一事,她對此感愕然,並說:「哦……OK!唔清楚呀!中午先有記者打電話問我關於佢哋結婚嘅回應。(究竟佢哋關係點呢?)唔清楚,都唔知發生咩事。(會聯絡崔建邦?)好耐冇聯絡佢,好耐都冇傾偈!(會關心吓?)唔會八卦呢啲,始終係私人嘢,佢咁大個人!」提到崔建邦拍多次拖都分手收場,猶如浪子一樣結不成婚,可會覺得可惜?詩詠說:「每個人都可以選擇自己鍾意方式,最緊要自己開心。」

此外,詩詠與溫碧霞及名模馬詩慧等,昨日出席另一活動時均性感示人。詩詠晒線頭狀態大勇,問到拍劇時可否性感?她說:「睇角色,但係露點就一定唔會,呢個係我底線,係電影尺度。」並表示早在劇集《神探高倫布》已裸背演出。