Philip Boxing Day開騷 車婉婉拋夫棄子報知遇之欣
資深藝人陳欣健（Philip）將於12月26日假旺角麥花臣場館舉行《陳欣健EVEN NOW此情此刻‧濃情金曲聖誕夜》處男演唱會，Philip今次可謂碌爆人情卡，請來昔日共事的歌手車婉婉及梁漢文做嘉賓，獲Philip帶入行的婉婉坦言今次是報恩，她說：「一定要報知遇之恩。」
送奶粉當補償
婉婉透露能夠做歌手全靠Philip，她說：「當年我喺美國讀大學一年級時，Philip飛咗過嚟探我，游說我去參加比賽，我以為選港姐，點知係參加歌唱比賽。」當年任職華星唱片高層的Philip說：「當年新秀想搵啲真係唱歌嘅人，本身認識婉婉媽咪，知佢好鍾意唱歌，為咗誠意我專登飛過去搵佢。」
婉婉原本聖誕節與囝囝及老公出埠旅行，如今行程有變，問到Philip如何作出補償？他笑說：「我諗要送好多奶粉同尿片畀佢囝囝。」隨即許下承諾說：「到佢個仔結婚我幫佢做司儀同唱首歌。」
似百老匯歌劇
問到Philip有否想過加場？他表示今次演出似百老匯歌劇，暫時在香港屬於試驗性質，他說：「我好有信心係一個好睇嘅騷，有得笑又有好聽嘅歌，一齊去歡樂，都想明年可以上紅館同埋好似華星年代去美加同內地登台。」問到處男個唱會否走埠？Philip說：「我覺得會，好話唔好聽，依家歌手冇乜做呢啲演出。」
文：音樂組
攝：吳文聰