同類玩（車立）門？「女鬼」雨僑勁驚！麥明詩約男仔過節主動畀人拖
每年萬聖節都是藝人鬥扮嘢的最佳時候，其中「十優港姐」麥明詩一改密實作風，化身性感版「茉莉公主」應節，更傳授溝仔絕招；而雨僑則扮成紅衣女鬼謝票，幸好冇嚇親男友羅力威！
向來甚少以性感打扮騷Quali的麥明詩（Louisa），前日趁萬聖節野性「大解放」，以動畫《阿拉丁》中的「茉莉公主」打扮現身無綫節目《#後生仔傾吓偈》。身穿低胸跌膊裝的她激罕晒事業線，盡騷香肩及纖腰之餘，更化上艷麗濃妝，十分誘人！有心水清的網民發現她去年曾以同一打扮出席派對，惟當時身穿小外套遮身材，直至今年才玩「突破」；亦有網民笑指Louisa相當環保，將萬聖節裝束循環再用。
情侶玩Cosplay
節目中，向來言論大膽的Louisa再度語出驚人，傳授萬聖節溝仔秘技，她獻計要主動相約男方，齊齊以情侶Cosplay造型亮相，並製造機會讓雙方有身體接觸，如拖手等，從而令感情更易升溫。
同樣扮嘢應節的還有雨僑，前晚她化身紅衣厲鬼「小紅」，到旺角一間戲院為驚慄電影《常在你左右》謝票，但她還未嚇人，自己已先嚇一跳！她笑說：「頭先搭(車立)都驚咁嘅造型會嚇親人，點知去到5樓，(車立)門突然打開，但係又冇人入嚟，即刻有啲驚！收工都係唔好周圍走，驚以為我係同類。」她又笑指男友羅力威很大膽，不怕「小紅」，而知道觀眾看戲時害怕亦覺得開心。
文：專案組