「個個都拍拖，唔通個個都想拍拖咩」阿嬌神遊金句 玄過黎明！

聽唔明先係真金句

阿嬌嘅「神遊金句」早排又登上另一境界，佢話：「唔通養狗唔可以嫁獸醫咩？」今次就連經長期訓練解讀「阿嬌密碼」嘅阿Sa都被考起，當堂「O晒嘴」，我Nuts哥惟有幫手解讀吓，即係「阿嬌識整餅，唔通就唔可以嫁畀阿茂咩？」咁樣解大家係咪清楚、明白！網民封阿嬌為女版金句王，如果黎明同阿嬌開場「核心外圍個個都拍拖嘅棟篤笑」，紅館勢必爆場。幻想吓黎明遇上Freestyle嘅金句嬌一齊Chit Chat，阿嬌出動佢「迷樣」嘅眼神，再無定向風嘅思路同黎明過招，爆句：「個個都天王，唔通個個都想做天王咩！」趁阿嬌蜜運當中，黎明最適合阿嬌嘅經典金句就係：「有冇機會拍拖，就好似見鬼一樣都要講緣分。」

黎天王嘅金句，我Nuts哥都袋住幾句傍身，學以致用拋吓金句娛人娛己，依家阿嬌升呢做「金句后」，令我又上咗一課，最緊要講得虛、講得浮，聽唔明先係「真金句」。記得阿Sa先阿嬌一步被踢爆與麻雀館太子爺戀情，但計番月份時間，阿嬌當時應該畀靚仔醫生賴弘國追到暈晒浪，可能阿嬌慣咗同男友「煲冬瓜（普通話）」綿綿情話，突然要轉Channel回應阿Sa戀事，結果就用佢慢半拍嘅語調吐出「金句」：「個個都拍拖，唔通個個都想拍拖咩。」企喺佢身邊嘅男神張智霖都聽到滿頭問號，阿嬌如神遊太虛嘅片段被網民瘋傳，仲將阿嬌金句旋即變萬能Key，配對出不同組合。

男友解碼能力高明

阿嬌能爆發「金句潛能」，男友賴弘國可謂應記一功，熱戀中嘅阿嬌，被男友冧到靈魂出竅，外人唔明唔重要，最緊要係阿嬌男友賴弘國識得解讀，將阿嬌冰山劈開，時時刻刻噓寒問暖玩追魂Call，又會飛嚟香港同阿嬌報到，男人做「黐身膏藥」都好少見，阿嬌今回「久旱逢甘露」點會唔Say Yes，連最棘手嘅「閃婚閃離」事件賴弘國都「拆得掂」，一早同阿嬌自首係「失婚男」，呢招赤裸自爆情史，原本扣分都變加分，難怪阿嬌都話唔介意男友「舊史」，所以賴弘國「解碼」能力比醫術更高明，洞悉阿嬌密碼，要封佢為「解碼王」先真。

Nuts哥