來自美國佛羅里達州的模特兒Lauren Summer一如其姓氏，絕對如夏天般火辣辣，現年23歲的她雖然擁有魔鬼身材，但原來她入行前差點因為恐慌症，險令模特兒夢碎。
新上位的性感模特兒Lauren，網上有關其資料不多，只知她曾為多本雜誌如《花花公子》（Playboy）拍攝照片。她成立官方網站，定期撰寫文章與粉絲分享動態。Lauren表示7歲時已立下志願成為模特兒：「我知道你哋會諗乜，做模特兒唔係咁大不了，但我嘅睇法就好唔同。我記得細個嗰陣，我同媽媽行入Victoria's Secret舖頭，我抬頭見到Adriana Lima行Catwalk嘅巨型照片，我嘅人生就出現新目標。」
現為性感女神的Lauren，原來小時候是「男仔頭」。她稱：「我同男仔玩係因為女仔好刻薄同小器，男仔就唔會理你係咩打扮，佢哋只會理你係咪搞笑，而呢一點我絕對係。」基於她年幼時的「男仔性格」，當她透露想做模特兒時，家人都只會當她鬧着玩。她又稱讀高中時，其衣着打扮相當求其，到了後來對男生有好感，才開始打扮。
長大後的Lauren快將實現天橋夢之際，卻與病魔糾纏。她稱2010年與幾名好朋友睇演唱會，原本充滿歡樂的一晚卻成為噩夢，演唱會舉行一半時她突然暈倒！她憶述當時經過仍猶有餘悸：「成個世界好似天旋地轉，個心跳得好勁，當時心諗『我就快死，就咁玩完』！我媽咪收到消息之後好緊張，之後我哋約見醫生。」醫生判斷她患上「嚴重的恐慌症」，她說：「我明白呢個病根本係冇得醫，不過醫生仍開藥畀我紓緩症狀，而嗰啲藥令我喪失個性、意志同幽默感。」去年她更因為藥物的副作用，導致膽有事，最後更要入急症室，經過檢驗之後，證實患上血清素症候群﹙Serotonin Syndrome) ，直至今年6月，其健康才有所好轉。
Lauren現時除了經常做運動外，亦減低藥物的劑量。雖然健康好轉，但偶然亦會出現恐慌的徵狀，令她不能入眠：「有時候我都要多謝『恐慌』，佢令我更堅強同明白事理。」
Lauren除了是模特兒外，亦是「Ig女神」。去年9月她開Instagram，至今追隨人數已高達14萬人。她經常在社交網「派糧」放超性感照片呃like！如果大家想大飽眼福，那就快快上Lauren個社交網畀like。
出生日期：1994年8月10日
身高：1米75
體重：58kg
三圍：34、24、34
文：外娛組