方力申恨演星戰貼錢扮死屍都制

方力申（小方）昨日出席在apm舉行的聖誕獨家《星球大戰：最後絕地武士》電影主題展覽及樂高星球大戰聖誕裝飾預覽記者會，同場還有新鴻基地產（中國）執行董事馮秀炎。

最緊要心中富有

小方看見現場有多個一比一的星戰Figure擺設時，身為星戰迷的他自言羨慕另一星級星戰迷：「屋企冇呢啲，但古天樂好似有好多，我冇參觀過，有機會都想去。」話雖如此，小方亦收藏了七、八件藝術品，每件重500公斤以上，最貴的雕塑值過百萬，他說：「係武士系列嘅 雕塑，人咁高，或者高過人都有，但香港地邊有咁多位，所以都係擺倉，啲倉都係租，因為屋企開畫廊，所以個倉加埋都有5,000呎。」問到其七、八件雕塑總值可要過億？他笑言：「咁又冇，太睇得起我。（係億萬富豪？）梗係唔係，唔好講呢啲，錢唔係最緊要，錢係搵唔晒，最緊要健康同開心、心中富有，心中嘅錢何止過億。」

方力申坦言想買一比一的星戰Figure。

方力申與新鴻基地產（中國）執行董事馮秀炎（右二）等出席活動。

讚子丹港人之光

雖然小方富有，但自認對事業仍有雄心，望有突破，更不諱言肯貼錢拍《星戰》系列電影：「有啲演員好恨拍荷里活片，有啲人唔恨，但我唔係，見半秒都好呀，喺《星戰》入面行過畀人『招』一下就死咗都好呀，或者瞓喺度扮死屍都得o架。（貼錢都制？）制，幾難得嘅機會。（肯貼幾多錢？）叫佢哋揀件雕塑走。」又指甄子丹能參演《星戰》外傳一個角色，是為中國及香港人爭光。小方又稱拍電影時曾因個人意見而跟導演發生拗撬，現學會意見照講，但對方不一定接納，認為相處融洽要緊。

文：音樂組

攝：林蔚茵