人妻、警花二選一 陳嘉桓硬起來做女漢子
演員陳嘉桓（Rose）與導演宋本中因合作網劇《反黑》而認識，原來試鏡時，宋本中曾「嫌棄」Rose太斯文，擔心她不切合劇中剛烈女警的角色，結果卻出乎意料！Rose的表現獲一眾拍檔認同，連導演都大讚她是「真漢子」！
Rose向來予人感覺斯斯文文，多數飾演嬌滴滴角色，不過她早前參演人氣網劇《反黑》卻一改形象，飾演性格剛烈的女警Heman！導演宋本中坦言初次見面時「嚇一嚇」，擔心看似柔弱的Rose未能應付角色：「第一次見到佢，即刻諗『死喇！咁女仔，點做差婆？』不過之後試造型同圍讀，佢又出奇地同啲拍檔陳小春、李璨琛夾到戲，最神奇係連聲都夾埋，講嘢字正腔圓好清晰，去到後期，大家覺得難讀嘅對白都交畀佢，佢嘅表現大家都非常滿意，原來佢可以咁男仔！」
添食拍埋電影版
Rose很開心得到導演讚賞，並自爆當初試鏡的小趣事：「起初係李璨琛搵我拍呢個劇，話做佢老婆，之後經理人公司話有個網劇想搵我做女警，到我上去見導演先知撞咗，最後揀咗女警呢個角色。」為了演好角色，Rose增肥及素顏上陣，雖然要與一班前輩演員陳小春及李璨琛等演出，她卻出奇地沒有半點膽怯，反而演得順暢，她說：「因為我已經投入咗個角色，角色好剛強唔會怯，其實我係一個幾硬淨嘅人，但只有屋企人同朋友先知，呢個角色可以將我呢個性格特質演出嚟！」
劇集第一季已經完結，因贏盡口碑及內地點擊率高，現已落實開拍第二、三季，更會製作電影版。陳嘉桓劇中拳拳有力，除了打到手腳滿是瘀傷外，亦試過不停奔走布滿發臭廚餘及垃圾的後巷，惡臭加上曱甴、老鼠，少點能耐也不能應付，Rose卻逐一克服！
籌集資金被輕視
劇集如今如此成功，但導演宋本中坦言初初籌集資金時，聽過冷言冷語：「乜嘢都未做到，畀人睇低好正常，我覺得呢啲反而係一種鼓勵。陳國坤、陳小春、李璨琛喺我未籌集好資金嘅時候都好撐我，佢哋仲有份投資呢套劇。」
文：影視組
攝：吳文聰