進軍台灣銳氣受挫 洪永城國語唔掂 靠異地戀惡補

【蘇震揚台灣直擊】藝人洪永城（Tony）、周柏豪及周慧敏等，昨日於台灣出席無綫「大大平台正式上線」記者會。眾人接受名嘴主持黃子佼提問，Tony被對方直指國語不標準，事後Tony笑說：「我仲諗住嚟台灣發展，依家畀佢挫一挫銳氣，要練習吓啲國語。」記者提議他找個說國語的女友，他笑說：「都OK，隨緣啦！（試過異地戀？）以前外國讀書試過。（未接受到新戀情？）都可以咁講。」他又指如有新戀情，不會刻意告訴舊愛唐詩詠。

周柏豪 冇意「造人」

而周柏豪指不時有台灣歌迷來港欣賞其個唱，望巡迴演唱會可加設台灣站。有指他加入無綫後工作多多，影響「造人」大計，柏豪說：「一直都冇造人計劃，老婆冇呻過。（有傾過？）坦白講真係冇，我好鍾意小朋友，但結婚都未夠一年。（儲奶粉錢？）係呀！」

在台灣人氣不減的柏豪，走近粉絲玩自拍。	洪永城被主持人黃子佼直指國語不夠標準。	一眾藝人到台灣為「big big channel」宣傳造勢。

周慧敏 開騷跳唱

至於周慧敏透露正忙與製作團隊商討明年一月的演唱會詳情，下月8或9日開始綵排，將於個唱中加入跳舞環節，並搵來好友古巨基私下為她設計服飾，希望有新的視覺效果及新鮮感帶給觀眾。

而電視廣播有限公司副總經理（節目及製作）杜之克指，希望將最新的節目於「大大平台」一齊上線，問到會否與myTV SUPER及TVB Anywhere有衝突時，他表示沒有：「我哋最大市場係香港、新加坡、馬來西亞同台灣，之後陸續有呢啲OTT服務，而TVB Anywhere係覆蓋全世界，有華人市場就有TVB Anywhere覆蓋。」