「層樓架車我買嘅，點食軟飯？」阿澤寸爆造謠者：你買咗樓畀老婆未？

杜汶澤又回想起當年的風光，到現在要漂洋過海甚至轉型工作：「原本一年拍八部戲閒閒哋搵千零二千萬，搞到一年搞一部，再唔係就漂洋過海，又或者喺電視台教人焗雞，遲下連KOL都做埋。有手有腳，餓我唔死嘅！」但因有人指他「食軟飯」、又曾被人叫他着太太出來幹活便可，令他甚氣結：「其實我早幾年搵落嘅錢，寫我嗰個，一世都未必搵到！層樓我買嘅，食我嘅，着我嘅，連佢揸緊架車，都係我送嘅，我點樣食軟飯呀？你今日買咗樓畀你老婆未呀？」他語重心長說：「我心諗，如果我因為做嘢做得唔好，我唔紅，咁我抵死。但封殺前我做主角嘅戲喺香港收三千萬，咁又係咩玩法？睇唔起我嗰啲同行，其實咁嘅成績你哋又試過未？」

DJ寸少戲拍

另外，他又談到前日在社交網以「不開名」方式鬧爆一名電台主持，當時他沒承認亦沒否認當事人是否梁泰來（Terry），但在昨日的發文中他寫下：「主持『Terry』一開始個錄音訪問，就已經陰陰嘴笑住咁話：『等咗呢個訪問機會好耐，你知你幾少戲拍o架啦！』」阿澤就話對方講得對：「既然我咁難得有戲上，希望大家多多支持！」最後他自我勉勵謂會戰鬥到底。而梁泰來昨日如常上班，但透過電台公關表示「無回應」。