郭羨妮古廟拍劇順道求子
郭羨妮昨日到古廟拍劇，劇情講述她拜神求子，育有5歲囡囡的她笑言拍攝時會順道求子。她又爆老公經常花錢送禮物，可惜全部不合心意，幾乎全部拿回商舖退貨換錢。
藝人郭羨妮（Sonija）、黃淑儀及曾航生等昨日到西環一古廟拍攝電台劇集，與曾航生飾演夫婦的Sonija，求子心切去拜神問卜。育有一女的她三年前曾經小產，被問可會順道求埋？她笑說：「一路拍嘅時候個心一路求，呢啲嘢我已經放鬆，唔會再刻意諗。人哋話刻意唔得，真係唔得，所以放鬆啲。依家心態係冇都唔緊要，我都有個女，可以好好栽培我個女，真係需要好多時間栽培。」
報讀傳統學校
Sonija透露囡囡明年升讀小學，過去一年忙於帶女兒考小學面試：「尋日先考完，我都報咗7、8間，唔算多，見到有啲人真係漁翁撒網，但我覺得好攰，我個女話好鍾意Interview（面試），覺得好好玩。」她未有考慮幫女兒報讀國際學校，反而想囡囡入讀傳統學校：「如果入唔到傳統嗰啲，就可能報讀IB（國際文憑課程），比較輕鬆。」
最鍾意折現
日前是Sonija與老公朱少杰結婚6周年紀念，她笑說：「老公返咗嚟5日，佢返嚟已經好開心，都係行街食飯買嘢。」不過她自爆老公每次送的禮物，都不合她水心：「佢使好多錢買，但都唔啱我用，通常我都拎返去Refund（退貨），然後再買其他嘢。（叫佢折現？）係呀，佢成日折現。有次我生日，佢話唔折現，好叻咁買咗兩部美容機畀我，但我都唔用，我咪又要換番錢買咗家品。」雖然老公經常返內地工作，但每個月總會回港幾日，剛由上海、北京工作返港的她說：「喺北京都有同老公見面。」
文：音樂組