林作願賣身做鴨還債

最近簽了范振鋒的電影公司踏足影壇的林作，前日突然自爆母親王莉妮財困要賣豪宅，他昨日隨即收到逾百位地產經紀來電，還得到明星太太慰問：「有冇嘢要幫手？」他大讚對方有人情味。但事件激嬲媽媽，林作在社交網補飛：「致各位地產經紀：收到太多基於『市場消息』而查詢嘅電話，我唔會再覆啦。」網民大讚他夠坦白，但亦有批評他的留言：「剛出道，好識製造話題，引人注意。」

「阿媽一時一樣 仲未清楚」

林作在電話受訪時呼籲經紀勿再致電他，問到母親之前不認賣樓，現在又認？他無奈說：「阿媽話事，層樓唔係我嘅，等佢喺北京返嚟先。」他繼而發揮創作力說：「我自己心大心細，希望全港市民幫我決定，會開放畀公眾討論。」並笑言將根據投票結果決定。對於母親前言不對後語，林作暗寸：「阿媽一時一樣，究竟邊個亂咁噏？佢係老闆，等佢諗清楚先，我係佢個仔點都撐佢。如果佢欠人巨債，我即刻幫佢跑數。（母債子還？）係，天公地道，但我要搞清楚先，未搵到佢，要我賣身都願意，我簽咗（范振鋒公司）啦。（做鴨？）做鴨我就冇乜條件，如果有人問都唔介意開價。（幾錢？）未有市所以未有價，但我簽約後，好多支持者覺得我朝小白臉方向發展都幾好，但要搞搞個頭先。」

另一邊廂，身在北京的林媽媽昨日與友人開派對，她表示報道一出即獲不少朋友慰問，着大家不用擔心：「其實有好多唔同嘅方案，可以將層樓租出去，反正有咁多地方，租出去唔好浪費咗佢，或者將層樓賣出去做其他投資，我有幾個想法同囝囝商量，暫時未決定，睇吓囝囝意思。」

文：名人組