黃心穎攞完獎忘形飛Bra

黃智雯、黃智賢（Ben）及黃心穎等昨日出席無綫劇集《雜警奇兵》宣傳，期間眾人大玩桌上足球比賽，非常投入的心穎玩到走光露Bra，場面香艷。

虛脫刮痧留紅印

日前憑劇集《與諜同謀》於《星和無綫電視大獎2017》獲頒「我最愛TVB女配角」的她心情靚絕，形容此行如發了一場夢：「事前冇諗過，到嗌我個名時，情緒湧晒出嚟，喊住講謝詞，返到後台有虛脫感覺。」她表示於台上答謝曾鼓勵過她的人，包括緋聞男友馬國明，她冧爆說：「佢有喺身邊鼓勵我。（一齊慶祝？）佢飛咗上海開工，我又要趕返嚟，但都去咗按摩、刮痧，刮到條頸紅晒。」對於有指她爆冷獲獎，心穎不介意並表示：「我唔會完全覺得自己唔值，但好值得又唔係，呢個心態幾好，令自己仲有進步空間。」

黃心穎坐低換上鴛鴦襪玩遊戲。	黃智雯晒肩現身，黃智賢亦搞笑露埋一份。	有靚女鬆骨，黃智賢玩遊戲自然更落力。

Ben寸黃智雯「冇料到」

至於獲「我最愛TVB電視女角色」的黃智雯，自爆當日到埗後才發現服飾容易走光，幸獲胡定欣及姚子羚幫手，花兩小時於衣服加工。在旁的Ben即寸爆說：「性感你得唔得呀？大家都有眼睇。」智雯卻滿有自信：「你懷疑我？其實呢啲嘢唔使多，夠就得啦！」

文：影視組