Yumi鬧完交認低威 絕世好女友

Yumi跟年輕9歲的化妝師男友發展姊弟戀逾一年，依舊愛得如膠似漆，秘訣就是她入得廚房出得廳堂。她甜絲絲說：「我係比較體貼嘅女朋友，都幾鍾意煮嘢食嘅，屋企家務又自己搞掂，有時佢覺得我似佢媽咪多過女朋友。」雖然年齡上有差距，但Yumi指相處沒有問題：「好多嘢我反而問番佢，我係路癡，佢似大哥哥話我知，外面嘅世界我唔熟悉，或者懶啦，想去倚賴。屋企嘢我就識，換燈膽都識，自己清潔屋企，唔使工人。」

讚男友浪漫

Yumi大讚男友浪漫，試過為她炮製驚喜生日：「嗰次毫無先兆，屋企突然熄晒燈，佢拎個蛋糕出嚟，以前多數一班人幫我慶祝，好少兩個人喺屋企過。」問到如何相識？她透露是在朋友聚會上認識，一年後重遇才相戀：「我哋好少鬧交，就算有，瞓醒覺就冇事，唔記仇，咁樣幾好，未試過嗌大交。大家知道有問題就會傾，傾唔掂嘅，第二日都會冇事，或者我氹佢：『起身啦，食嘢未呀？』我係會做主動嗰個。」

Yumi坦言肥了不少，慶幸男友不介意她身形。

由於自小已喜歡下廚，故Yumi廚藝相當了得。

努力減肥

提到拍拖後心廣體胖，Yumi尷尬稱：「拍拖同肥咗係有關係，不過我有一星期做一次運動，之前皮膚敏感，半邊面生晒粒粒個半月，食咗西藥，所以個人好水腫。」她承諾會努力減肥，回復最佳狀態。

文：李惠儀

攝：吳文聰

場地：MioXpace