「精算」薛凱琪 待嫁36 「鬱」完翻生做樓后
依家藝人行出嚟唔止面對傳媒批評，網民嘅力量都龐大，一個唔該就變負評王！講到負評多，薛凱琪（Fiona）以前就真係Number One，連抖啖氣都畀人話，早排仲有人O晒嘴同我Nuts哥講話佢拍避孕丸廣告，又Open又大膽！計我話有咩咁出奇呢？搵佢做代言都好有說服力吖！我唔係話Fiona係避孕專家識得控制生育，而係佢識得喺歷史吸取教訓！佢本來係衣食無憂嘅中產港女，一瞓醒覺無端端老竇破產、有抑鬱谷到爭啲自殺同閻羅王Say Hi！幾乎死過翻生嘅佢，深明做人都係全天候做足準備好啲，唔怕一萬最怕萬一，唔驚有意外發生，條路仲愈行愈富貴！
百慳成金 3,630萬買豪宅
Fiona出現喺娛樂版冇乜出奇，要搶版位就梗係玩到去地產版啦，佢豪斥3,630萬買咗何文田千呎豪宅作為36歲生日嘅賀禮！嘩……若然條數咁計，過多幾年40歲咪要買4,000萬禮物慶生？平常女仔送生日禮物畀自己，大手筆嘅咪買個名牌包包囉，但佢去到買樓喎！咪以為佢今時今日咁風光升格圈中「樓后」就羨慕到Bling Bling眼，佢喺呢個圈14年一直唱緊：「又越過高山，又越過谷！」每走一步都係有血有淚o架。佢曾經講過每個月阿媽只係畀兩萬做使費，雖然兩萬蚊對於平常人嚟講已算多，但係作為一個星就真係要好識計數，精打細算慳住使先得啦，唔係邊得嚟今日「百慳成金」咁風光阿！
當年Fiona憑住省鏡靚樣入行，冧到班宅男暈陀陀，點知接咗套《學警雄心》演女警，長髮一剪，長頸即時「無所遁形」，被譏笑「長頸鹿」又話佢係泰北長頸族後裔，靚女形象蕩然無存，負評效應成「萬能Key后」！試過唱片造型《August Girl》被惡搞P圖變成「屙緊屎女孩」。Fiona因不時ABC掛口邊，話佢扮晒鬼妹仔兼有公主病，佢都係一笑置之，但當觸及到家人同愛情就「插中死穴」。
中產變破產 老公慢慢揀
父母離異令Fiona跌落人生谷底，當時薛爸爸生意失敗欠債破產，兼且有埋第二頭住家，對自細喺中產家庭Comfort Zone長大嘅Fiona可以話係世界末日！老公就話有得揀，父母係天注定，做慣公主嘅Fiona要孭起頭家，但撐得住親情，又敵唔過情關。多年嚟Fiona戀事，房祖名應該最「像真」，同男友分手呢劑反而跌得最傷，谷埋谷埋爆煲有抑鬱症，惟有倣效荷里活喜劇巨星占基利（Jim Carrey），靠支「畫筆」發洩，最慘自細家人教佢「家醜不得外傳」，屈到臨自殺前打畀方大同「告別」，好彩經勸解先至執番條命！呢鑊「才子救女神」卻撮合唔成兩人，皆因方大同愛音樂多過女人！
當大家都以為佢情路「旱」到爆裂，突然Fiona與相識十幾年嘅富二代傳暗撻4年兼「秘婚」，雖則佢否認結婚，但係佢經常喺男方所住嘅屋苑出現，就連保安都爆料話佢有「富太氣燄」！女星同富二代走埋一齊，好多口痕友當然多嘢諗，一定又話貪錢之類， 不過我Nuts哥覺得Fiona今次識揀喎！Fiona話男方曾經點醒佢，話當有人去評頭品足你嗰一刻，其實佢係暫時放低咗佢本身嘅煩惱，變相你係幫緊佢！嘩！咁都諗得到，好高啫！有錢又有腦，唔係唔揀嘛？
Nuts哥