鄭少秋懷念化妝奇才 陳文輝太太不離不棄：我係佢天使

已退休十多年的81歲前無綫首席化妝師陳文輝，月前患上末期肺癌，至前晚中秋夜病逝，家人陪伴在側，其化妝師兒子陳志達表示昨日是假期，要今日到醫院拿死因證明後才到生死註冊處領死亡證，再着手籌備喪事。前晚11時許，陳志達與太太、阿哥、阿嫂及陳文輝第二任太太Deborah離開醫院。陳志達表示手續尚未辦好，父親遺體仍留醫院，後事暫未決定，要與家人商量。他送畢親友回家後，才返回將軍澳寓所。

Deborah受訪時坦言在陳文輝患病期間，一直陪伴在側，知道對方這幾個月心情仍佳：「佢瘦到得番70幾磅，作為佢嘅另一半係好心痛，但佢喺癌症中心一路有治療，有醫生睇住，佢過唔到中秋節，佢都冇得揀，呢幾個月對輝哥嚟講係賺咗。（有咩心願未了？）都冇乜心願，佢都兒孫滿堂，唯一牽掛咪我囉！我日日都對住佢，輝哥同我講，我係佢嘅天使。」

Deborah陪陳文輝走完最後一段路。	郭羨妮讚前輩做事認真，有威嚴。	滕麗名指前輩是好仁慈的老人家。

滕麗名 郭羨妮不捨大師

陳文輝病逝令圈中合作過的藝人都大感惋惜不捨，陳文輝早年曾表示最難忘是1977年為鄭少秋於劇集《大報復》中設計的五個分身造型，鄭少秋得知對方過身亦相當難過：「佢以前喺化妝界首屈一指！記得當年設計嗰五個造型，搞到輝哥太辛苦，仲病咗添，佢係難得嘅化妝界人才！」而薛家燕亦大讚對方有獨特化妝技巧：「我好細個拍戲，放學去化妝恰眼瞓，佢托住我個下巴幫我化埋佢，後來我復出拍《真情》，佢鼓勵我積極面對。」黎耀祥指陳文輝睇住他入行，大讚對方為人公道一視同仁：「喺化妝間好照顧後輩，對我哋呢啲三四線嘅都好照顧、好體貼！」羅嘉良自言跟陳文輝的化妝團隊學化妝，非常感激對方。而馬浚偉以「好可愛、好好人、好好玩」形容前輩，滕麗名、黃智賢、郭羨妮亦為前輩病逝感難過。

薛家燕、鄭少秋與陳文輝合作無間。	黎耀祥	羅嘉良

吳雨爆「雀友」愛食詐胡

至於前無綫高層吳雨接受電台訪問，大讚陳文輝是頂級化妝師，又指對方是其「雀友」：「佢好鍾意打牌，不時食詐胡，食詐胡佢就話賠咪賠，不過大家都係玩吓。」他透露兩個月前曾跟徐小鳳到醫院探望對方，當時其聲線微弱但頗精神，捉住小鳳講陳年往事。

陳志達（右）與哥哥前晚離開醫院，神情哀傷。	雷淑賢（左）大讚恩師Open，鼓勵創作，旁為馬浚偉。	黎放明

「乜都得先生」 帶挈後輩重拾尊嚴

陳文輝於無綫任職37年，下屬眾多，跟隨了對方廿多年的前無綫高級化妝師雷淑賢受訪時，表示上月才探望對方：「冇諗過佢咁快離開，佢係一個非常好嘅上司，對無綫好忠心，佢教曉我好多嘢，我喺無綫二十年，好Proud Of有呢個老闆，覺得自己好幸運。」她又指陳文輝令化妝師地位重拾尊重：「佢令化妝師喺呢一行嘅地位提高好多，有番尊嚴。輝哥好Open，唔會阻我哋創作，畀好多空間我哋，好鼓勵我哋學。」

而同樣於無綫跟隨輝哥十多年的黎放明亦說：「輝哥好有權威，佢講就係(口架)嘞！我離開無綫都有跟佢出去做嘢，記得有次做Show突然有個化妝師甩底，但輝哥一句：『冇問題，一定掂，放心。』咁大家就照做，之後我同佢講：『輝哥！好嘢喎！點解可以咁鎮定？』佢話出嚟做嘢，最緊要話咗得先，得唔得大家嘅標準唔同，你講咗得，人哋對你就有信心。」

文：影視組

攝：追蹤組