「過來人」王曼喜：應打開心窗支持
公開「出櫃」的圈中人對卓林出櫃有不同意見，王賢誌坦言：「我雖然唔識佢，但都有迹可尋，不過佢仲細，之前公開出櫃嘅人都係比較成熟，經過深思熟慮，我唔敢講話贊成或反對，佢呢個年紀比較反叛，所以大家都唔好畀咁多壓力佢。佢同媽咪嘅關係有啲複雜，我反而比較關心母女關係多啲，始終呢個關係冇得改變，要小心處理。」
至於王曼喜則送上祝福：「我覺得對於年輕人要『出櫃』需要好多信心同鼓勵。我好好彩，我父母都好支持我同愛我，我希望年輕人『出櫃』都獲得家人支持，因為家人嘅愛好重要。我覺得任何人肯定自己取向，大家應該打開心窗去支持。」至於第一對公開在港「結婚」的同性名人鄧達智說：「佢有自己嘅選擇，我本身因為佢媽咪而識佢，嗰時佢仲細個，我有同過佢哋食飯，之後大咗都冇乜點見，佢好叻，比起20幾歲嘅人仲成熟，如果話擔心佢搬出嚟住，我覺得對佢嚟講就唔需要，識自己照顧自己。」
