周慧敏開騷 拒扮美少女
歌手周慧敏（Vivian）昨日出席電台訪問，提到明年1月舉行3場紅館個唱，服裝方面會符合身份：「我都50歲嘞，唔通仲美少女戰士咩，唔想虐待觀眾，成熟有成熟嘅性感。」
提到好友古巨基與太太Lorraine在美國拉斯維加斯經歷槍擊驚魂，Vivian稱：「佢哋嗰邊上網線路好差，件事發生之後，Lorraine message話我知喺Vegas好混亂，跟住我先睇新聞原來咁誇張，佢哋仲困咗喺入面唔知外面情況係點，係好驚嘅，佢報咗平安，我都冇咁擔心，佢哋應該就快返嚟。基仔係我個唱總監，本身約咗下周開會，不過等佢哋返嚟休息吓先再決定。」