何超蓮唔做娘娘做宮女

賭王何鴻燊三房千金何超蓮昨日出席紮火龍義工活動，與小朋友一同舞火龍及派月餅。她透露中秋節正日會在街頭派1,000盒月餅，將提早與父母於星期二食飯做節。提到中秋節冇「兵」約？她笑言：「約咗月餅，食到我塊面圓晒，冇兵呀。（鍾唔鍾意做娘娘？）唔鍾意，鍾意做宮女，娘娘養尊處優唔啱我，呢個年紀要出去做嘢，辛苦啲。」她透露剛到河北探訪老人院與孤兒院送月餅，第二日就飛澳洲搞酒店項目，相當忙碌，笑言與慈善拍拖。