朱晨麗關楚耀拍拖變走鬼
朱晨麗（朱朱）與關楚耀（Kelvin）難得為新劇拍攝談情戲，卻慘變「逃命鴛鴦」！要來回跑十多次的Kelvin，更抗議整套劇只能拖到朱朱手仔！而朱朱則爆料經常被對方偷拍，笑言不擔心被拍下醜態影響形象。
無綫花旦朱晨麗、歌手關楚耀日前為新劇《特技人》拍攝外景，劇組搭建臨時天光墟，更動員近百臨時演員飾演小販與路人，場景幾可亂真。劇情講到Kelvin帶朱朱到墟市「見家長」，期間一隊執法人員出現驅趕小販，現場近百人即時湧向出口，畫面如動物大遷徙！手執大袋細軟的Kelvin則拖實朱朱做「逃命鴛鴦」。
拖手觸電似行雷
朱朱與Kelvin受訪時笑言到場才知道墟市由劇組搭建，貪玩的Kelvin更拿起道具缽仔糕及T-back內褲把玩，笑言見一班臨時演員相當入戲，自己亦忍不住上前殺價。Kelvin又抗議與朱朱少有談情戲份：「呢一場拖到手係最親密o架喇！」問拖手可有觸電的感覺？朱朱即搞笑說：「直情行雷添呀！」講到有否帶女友見家長的經驗，Kelvin即拉開話題：「個婆婆我都係啱啱識咋！自己都單身一段時間，呢段時間都冇諗，投入番拍劇先。」
偷拍照唔怕流出
問到Kelvin有否藉故攀談？朱朱笑言：「大家最常傾就係影相，佢成日拎我做Model，畀佢影咗好多相都唔知！（怕唔怕有相片流出？）我唔怕佢放出嚟，但佢真係要睇實啲手機同相機！」Kelvin則指今次拍劇經驗難得，拍攝尚有兩星期但已感不捨：「自己之後都要飛內地拍戲，今次係一個好難忘嘅經驗，希望可以同一班演員慶功！（出錢搞慶功宴？）已經同譚俊彥傾咗想搞，而朱朱喺呢套劇舉足輕重，佢要出大份！」
文：影視組
攝：司徒國榮