現年20歲的美國真人騷女星Kylie Jenner傳未婚懷孕，雖然與25歲饒舌歌手男友Travis Scott拍拖只有5個月，但已懷有4個月身孕，B女預計明年2月出世。
Kylie一直模仿同母異父家姐Kim Kardashian的上位模式，除了令外貌變得與Kim相似外，又學對方在社交網站Instagram頻頻上載性感相「賣大包」累積人氣，並推出時裝系列與化妝品。Kim選擇饒舌歌手Kanye West為另一半，Kylie亦照跟，先與饒舌歌手Tyga拍拖，兩年後分手，今年4月搭上另一饒舌歌手Travis，更有傳她已被搞大個肚，現時懷孕4個月，即兩人拍拖只得一個月就閃電大肚！
據稱Kylie與Travis月初分別向好友報喜，Travis更講明會生B女，生活將有巨大轉變，預產期是明年2月。兩人雖然未有向外承認，但傳媒拍得Kylie本月12日出街時以鬆身衫示人，穿得密實，身形似乎有點發脹，而她在社交網亦只貼半身相或舊相，令懷孕傳聞更添可信性！不少網友都上載惡搞圖贈興，諷刺Kylie大肚令人「意想不到」，又有人提出最近是Kardashian家族推出真人騷節目10周年，不排除只是宣傳手法。其實Kylie早已恨做媽咪，她與舊愛Tyga拍拖時，曾表示30歲生B太遲，又指每個睇相佬都預測她會有兩個小朋友。
另外，Kylie的星媽Kris Jenner前日出席米蘭時裝周，捧場睇Kylie的模特兒姐姐Kendall Jenner行天橋，面對女兒做未婚媽媽的傳聞，Kris未有回應。至於Kylie的舊愛Tyga玩嘢，在Snapchat轉載新聞聲稱自己才是BB的生父，不久後刪文，其後在街上被狗仔隊追問Kylie傳大肚時，無言以對。
文：外娛組