Heidi撇甩SG 鋪路創個人品牌

Heidi早前接連到倫敦、米蘭及巴黎三大時裝周，是不少人的夢想，也一圓她多年來的宿願。本職歌手的Heidi讀時裝出身，大學時主修Fashion Image Design，不難想像初到時裝周的她那種膜拜心態，她興奮地說：「所有嘢都好難忘，係夢寐以求，我以前讀書都要睇好多外國時裝騷，但只係喺網上睇，依家係現場睇，所以特別開心。」

後台遇名模

一直視名模Gigi Hadid及Kendall Jenner為Fashion Icon的Heidi，今次時裝周之行有機會近距離見到偶像，令她雀躍不已：「佢哋兩個着衫好靚，又有個人特色，尤其Gigi好有女人味，我覺得好多女人都會鍾意佢呢類型，佢好性感，身材又好，型又得、女人味又得。我喺後台見到佢，但佢好忙又要趕住去下一個騷，所以就冇合照。」

Heidi今次應品牌之邀出征時裝周，多少有點升呢意味，在歌唱事業以外，她亦有意在時裝界發展，推出個人時裝品牌，並已有初步構思：「會以衫為主，傾向Street Wear風格，我間中都會諗定啲設計，見到靚嘅設計或者元素都會畫低。」

Heidi獲邀出席時裝周，「升呢」不少，一身打扮亦經過悉心搭配。	除了唱歌、演戲，Heidi亦有意成立個人時裝品牌。	Jessica（左起）、Aka、Heidi、Cheronna及Yanny性格各異，花了不少時間磨合。

參與組合形象設計

雖然Heidi畢業後未有走上時裝界專業，反而在機緣巧合下參加當時在大學舉辦的模特兒比賽，順利進入現時的經理人公司，並以歌手身份出道，但Heidi慶幸以前在學校所學的東西也派上用場，她在服裝上及組合形象設計方面也提供不少意見。

Super Girls於2012年出道，初時走少女風格，由歌曲《鎂光燈下》開始逐步向女性化方向發展，開始有輕熟女的味道，這與Heidi的個人風格十分近似：「希望自己嘅Style係女人味之中會有少少型格。對我嚟講高跟鞋係不可或缺嘅單品，可以令整個造型加分，相信每個女仔都難以抗拒高跟鞋，着咗之後女人味出晒嚟，而且愈高嘅高跟鞋，愈有提臀作用，塑造到女性嘅身材曲線。」

想似Big Bang個個掂 誓做香港天團

Super Girls成軍五年，去年終於在九展舉行演唱會，在樂壇愈見成績。除了音樂以外，Heidi透露今年會在電影方面放多點時間，但她強調並不代表組合會分散，又指對她們來說，音樂始終排第一位，Heidi說：「我哋五個私下有傾過，我哋想好似韓國天團Big Bang咁，各成員喺唔同範疇可以獨當一面，之後又一齊做音樂，呢個係佢哋成功之處，我哋都會努力朝呢個方向前進。」雖然大家在不同領域各自努力，但對音樂的初心始終不變：「我哋由一開始到依家個目標都係一樣，就係希望做到諗起香港組合就會諗起Super Girls，當然我哋仲有好多不足之處，例如唱歌跳舞可以再做好啲，希望下次可以喺伊館開演唱會，紅館就唔敢諗住。」

逐一品評SG隊友

一隊組合能成功，團結是關鍵之一，Heidi坦言五位成員性格各異，故一開始並不是很合拍，由初相識到合作無間，大家花了一年多時間磨合，因工作關係，見面時間比家人還多。作為組合中最年輕的成員，Heidi笑言經常被隊友取笑很呆，至於她又怎樣評價隊友？她說：「Cheronna係人馬座，為人好熱情，係一個好Outgoing嘅女仔，佢有少少鬼妹仔性格，五個人之中最唔怕醜，佢唔介意講啲核突嘢同扮醜去引我哋笑。隊長Aka做嘢好有條理、好認真，但佢私下其實好大頭蝦、好亂，係一個好傻嘅女仔。Jessica係最理性同最成熟，所以我哋好多嘢都會問佢意見，佢邏輯力、分析力同觀察力都好好，好多時做嘢，我哋掛住嘻嘻哈哈，但佢會留意身邊發生乜事。至於畀人感覺好Cool、好寸嘅Yanny，係最多嘢講嘅，佢其實好易喊，仲好有愛心，好鍾意小動物。」

文：名人組

攝：秦健輝

服裝：Shiatzy Chen