衛詩雅780萬買樓：咪等人養！

32歲英皇女星衛詩雅近年事業升呢密密做，過去兩年至少有八套電影作品上映，當中包括《失眠》、《原諒他77次》及《喵星人》等，加上商演及廣告收入，賺個盆滿缽滿，昨日更有消息指她成功置業！詩雅在社交網發文透露，昨晨一早收到電話去睇樓：「已經兩日冇瞓嘅我，一返到屋企收到個好突然嘅電話就要立刻撲出去！既興奮又緊張嘅心情！人生第一次！」

首期畀兩成

據知，詩雅最近購入啟德龍譽1B座高層單位，面積348呎，買入價780萬元。記者致電向她求證，她承認其事並驚訝地說：「我買嗰陣好低調，應該冇人知，估唔到咁快已經有報道，好多朋友恭喜我！」詩雅透露因首次置業而獲折扣，付兩成首期，她笑言未跟父母商量就扑槌：「係咁多年拍戲辛辛苦苦儲落，自己要繼續努力供。（父母幫手？）連屋企人都未知！相信父母會嚇一跳，希望佢哋知道後會幫吓手。」

之前詩雅表示Dream House是有花園的村屋，她笑言這理想未曾改變，只是暫時先在啟德上車：「呢個同我Dream House距離係有啲遠，不過我覺得呢區將會係重點發展地區，而且行去港鐵好近。我想同父母住，但新單位太細，我本身住得偏遠，可能做嘢太夜嘅時候可以去呢邊瞓，又或者租畀人，我仲未決定，依家思緒仲有啲亂！」

衛詩雅自爆瞞住媽咪扑槌買樓。	衛詩雅自言兩日冇瞓，晨早撲出去睇樓。	衛詩雅早前擔正女一，與影帝秋生做對手戲。

女仔要自強

單身的詩雅靠自己買樓，形象愈來愈女強人，問會否怕令男士卻步？她笑說：「依家新一代女仔養男仔添啦！千祈唔好等人哋養，咁樣太冇安全感，做女仔要自強啲！」

文：影視組