周柏豪嗌飢渴老婆出肉慰勞
即將舉行巡迴演唱會的周柏豪前晚出席主演的電影慶功宴，面對喜歡的火鍋宴亦只能烚菜，又指自己要「捱餓」到明年，幸而太太出奇謀為他解「飢渴」。由於電影成績不錯，柏豪有機會與一眾拍檔再結片緣。
由張繼聰、周柏豪、林盛斌（Bob）、林敏驄及蔡瀚億等主演的電影《西謊極落：太爆．太子．太空艙》在港錄得超過800萬票房，台前幕後前晚舉行慶功宴，席間有份投資的蕭定一說：「毫無懸念會開拍續集！」柏豪即「起火頭」謂：「票房過千萬嘅話，阿Bob表演掌摑林敏驄呀。」
張繼聰自認靚仔一族
柏豪接受訪問時大讚有份參演的林敏驄反應快，經常令拍檔招架不住。記者笑問對方有否掌摑他？柏豪即笑答：「如果摑埋嚟我度，我實閃啦，我靠個樣搵食o架嘛！」即將舉行巡迴個唱的他，更搞笑抱怨今次搞火鍋慶功宴：「我好鍾意打邊爐，但要開始巡迴演唱會，每個月去一個地方，一直做到出年先完，我已經好多餐冇食飯喇，嚟呢度慶功即係叫我只可烚菜食，我好飢渴呀。（太太點幫你解決飢渴？）佢咪整啲肉畀我食囉，佢都好努力，我教練話我聽日可以食肉！」
張繼聰聞得開續集，即表示希望能與眾拍檔再合作：「其實柏豪鏡頭後好有喜劇細胞，我覺得我哋幾個合作，幾似八十年代電影裏面嘅五福星，高矮肥瘦樣樣齊，我梗係唔會話我係屬於阿Bob嗰邊，梗係黐靚仔嗰堆啦。」
雨僑呻男友飲湯挑剔
片中精於煲靚湯的雨僑笑說：「我本身煲湯唔叻，但如果老闆（蕭定一）肯撥少少舖位畀我搞『阿麗靚湯』都唔錯。（男友羅力威鍾唔鍾意飲湯？）佢唔鍾意熱辣辣嘅湯，但攤到凍咗又嫌唔夠熱。（咁難服侍？）好多男仔都係咁。（佢鍾唔鍾意按摩？）唔鍾意，我都唔識按摩。（佢究竟鍾意咩？）音樂囉，呢幾年我拍戲多，音樂少接觸啲，唔夠Grade同佢Jam歌。」
文：影視組