親解復合之謎溫碧霞分開至知老公重要！

「美魔女」溫碧霞（Irene）與老公何祖光結婚17年，育有養子Xavier，一家三口生活美滿，但今年7月突爆Irene主動提出與老公分開，她為此親自解畫說：「最主要係我比較忙，聚少離多，感覺冇以前咁強烈，唔係佢有問題，佢只係唔想我拍劇一走幾個月，但我好想追求理想，想過番一個人嘅生活，唔想太多牽掛，係我提出分開嘅，我想追求婚前嘅Freedom！」

夫妻情更進一步

Irene強調當時與老公只是分開，並非離婚：「根本冇講離婚，分開後我係幾享受一個人自由自在無牽無掛，做乜都唔使同人交代，但後來新聞出咗，影響到雙方屋企人，老公覺得點解講到係離婚咁大件事，對佢好唔公平。分開後我發覺佢真係好愛我，放棄咗佢，可能搵唔番，講真，我冇為感情喊過，但佢去美國搵我，我好感動，依家喺番埋一齊住，感情好過以前，分開至知對方重要，會識逗對方開心，似番拍拖嗰陣，嚟緊十月一日結婚紀念，我哋會二人世界去旅行！」

婚戒失而復得

Irene更提到從老公丟失婚戒得到啟示，她說：「我先生打高爾夫球會除婚戒，之前佢唔見咗隻戒指，咁啱就喺我哋有問題嗰段時間，但好神奇地，我哋喺番埋一齊，又搵番隻戒指，好似一種啟示，話畀我哋聽要珍惜。（Xavier有冇受影響？）嗰段時間佢成績差咗好多，佢都有問我係咪可以多啲留喺香港，仲話：『問題喺你度！』我好唔想小朋友受影響，呢件事對我哋影響好大，上咗寶貴嘅一課！」

文：影視組

攝：劉斌

場地： 富薈馬頭圍酒店

化妝 ：Khaki yan

髮型 ：Ken Ng @ Queens Private i