歐錦棠跌甩骹托正即復工
藝人歐錦棠前日為音樂劇演出時發生意外，致左手甩骹，敬業的他仍堅持演出，往醫院求診，醫生為他托回手骹，阿棠忍痛再返現場完成尾場演出，同劇的張崇德亦讚揚阿棠，專業地全面顧及音樂劇的運作。
近日為音樂劇《馬丁路德》演出的歐錦棠，前日演出日場時發生意外，導致左手甩骹，阿棠忍痛完成表演才去醫院，經醫生診斷後托回手骹，阿棠卻不聽醫生吩咐留院一晚，自行簽字出院，再折返演出現場，完成晚上的尾場，其專業及敬業的精神令人敬佩。
在醫院求診期間，阿棠將受傷照上載社交網，並答謝醫護人員，更留言：「今天下午場再出意外，失足跌斷手（甩骹），在地上眼看自己的前臂已扭向外邊，且不能動彈……趕到醫院的斯敏（太太）便很堅定的向製作人員講：話畀監製聽，阿棠今晚係一定會返去演出嘅！當下心裏有很大的欣慰！有這麼一個了解我又同樣尊重熱愛表演藝術的知己老婆！」
自嘲「阻手阻腳」
事後阿棠受訪稱今次受傷純屬意外：「我要唱歌跳舞，其實之前綵排都覺得舞台好『啜』腳，我先係左腳拗柴，跟住再跳時比較留神左腳，重心就放咗喺右，有個動作要跳起，我落地時左手輕傍住，『啪』咗一聲，左手都拗咗去後面，甩咗骹。」阿棠昨日再去覆診睇骨科：「大約要幾星期先可以好番，好番仲要做物理治療。」之前同樣為此劇意外令左腳拗柴，今次傷埋左手，阿棠自嘲「阻手阻腳」！他透露腳傷已康復八成，昨晚更為另一舞台劇《男女PK大作戰》綵排，阿棠笑言：「我食咗消炎藥都冇咁痛，老婆好明白我嘅熱誠，佢仲喺我入院暈暈哋時，影咗我一張相，畀我作紀錄，佢咁支持我都好開心，痛都冇所謂！（之後可以休息？）唔使喎，我之後都要為《男女》開始綵排！」
張崇德唔知咁大鑊
同劇的張崇德很擔心阿棠的傷勢，又讚揚其專業：「當時我同阿棠合唱，突然間就聽到一下啪一聲，因為我仍要繼續做戲，後來先知咁大件事，因為佢喺我間房門口等十字車，我當然擔心，但佢仲同我講，崇德唔好擔心，搞到你唔好意思，唔好影響你做戲。佢除咗係好專業嘅演員外，仲顧及整個劇，佢仲諗場戲冇咗佢點算！」
文：影視組