JW發台瘟尷尬到喊
歌手王灝兒（JW）與林奕匡即將為音樂會演出，入行多年的JW自爆發台瘟，坦言試過唱唱吓腦海一片空白，為免尷尬以「Lalala」帶過，落台後因太嬲自己爆喊收場，JW承諾不想再有瘀爆片在網上流傳萬世，決定每次演唱前重複聽百次。
JW近年頻頻孖男歌手開騷，早前與吳業坤開完音樂會，9月中又同林奕匡（Phil）參與音樂會，演出經驗豐富的兩人原來試過無數次發台瘟，自認記性差的JW直言曾一度腳軟，問到如何執生？JW說：「試過就咁塞啲字落去，或者唱番第一段啲詞。（試過好尷尬？）有，落到台即喊。」她憶述出事經過：「當時腦內一片空白，因為之前顧住排舞，點知真係唔記得歌詞，完全空白咁Lalala咗去，當時都幾多觀眾。」
誓要背熟歌詞
專業的JW直認很嬲自己，她說：「唔知觀眾知唔知，不過好嬲自己點解會咁樣。」知錯的她表示此後每次演出都會背熟歌詞：「真係唔敢，依家每次上台前都會不停重複去聽首歌。」
至於Phil亦承認經常發生尷尬事，最嚴重一次是在商場舉行小型音樂會：「要唱十首歌，同事話唔使驚忘詞，台上有歌詞機，點知唱唱吓對眼唔知係咪畀燈光影響突然眼矇，乜都睇唔到，真係好尷尬。」
歌迷拍片上網
Phil表示最慘是唱師兄陳柏宇（Jason）的歌曲，當時有不少對方歌迷在場：「好多Jason嘅Fans喺度，嗰兩句惟有亂唱，真係好瘀呀，最慘有歌迷拍片放上網，仲留言話Jason唱得好啲。」身旁的JW反應極大說：「呢啲時候好想Delete條片，唔想流傳萬世，所以依家表演要好小心。」
文：音樂組
攝：張福宏
場地：The Stadium