周慧敏影海報畀林海峰考起
歌手周慧敏（Vivian）為慶祝入行30周年，將於明年1月26及27日假紅館舉行《一萬天荒愛未老．周慧敏30週年演唱會》，日前網上優先訂購門票，吸引不少粉絲撲飛，搞到網站一度停頓，未能搶飛的粉絲即致電主辦單位詢問公開發售時間。
相隔7年再踏紅館舞台的Vivian日前拍攝宣傳海報，邀得多次合作的林海峰（Jan）操刀。由於Jan事前未有透露如何拍攝，令做事認真的Vivian無所適從，她說：「今次係呢十幾年嚟唯一一次，去到現場唔知自己要影啲乜，所以帶咗十幾套衫同十幾對鞋去。」隨即自豪說：「好彩有一件有用，同Jan都熟，信晒佢。」
「趁仲有體力就做」
Vivian坦言過去多年被不少歌迷詢問何時開騷：「從來冇回應過佢哋，覺得呢啲好難承諾，做騷心態要Ready好先做到，就算紅館批咗期畀我，我都諗咗幾個月先答應做，因為開一次騷就一個倒數，趁自己仲有體力就做。冇諗過可以做到30年，始終唔係全職歌手，希望今次個唱同大家集體回憶過去30年。」
文：音樂組