陳庭欣冰火之旅加重病情
陳庭欣（Toby）早前到斐濟拍攝節目，因天氣反覆令她病上加病，入海深潛冷得騰騰震，不過大晒33C「蜜桃胸」玩泥漿溫泉時又熱到見暈，冰火之旅認真有苦自己知！
前香港小姐冠軍陳庭欣（Toby）為拍攝無綫節目《3日2夜》到斐濟八日，她帶備大批三點式泳衣及背心短褲出擊，準備在斐濟與陽光玩遊戲，但一落機就發現出事，當地天氣比想像中涼得多，令本身病住上機的她病情加重，抵埗後要休息一日才投入拍攝，她說：「以為斐濟喺南半球天氣好熱，但撞啱天氣唔好，帶唔夠衫，要工作人員幫我去買褸。」
海底大開眼界
Toby幾乎全程以背心、短褲及泳衣上陣，但拍攝時卻涼風陣陣，惟有頂硬上。其中一日要入海深潛拍攝，實在冷得她騰騰震！她說：「因為現場租嘅潛水衣比較鬆身，冇咗貼身保暖效果，潛到落去真係好凍，凍到好想咳，我有潛水牌，但唔係好叻，又驚咳唔知點處理，忍咳忍得好辛苦，但係啲水真係好清，珊瑚、魚仔好靚。」
飲怪味「泥水」
早年Toby在節目《為食總司令》中以三點式歎泥漿浴令宅男刮目相看，今次到斐濟，她再試泥漿溫泉為肌膚美白，她笑說：「自己霸咗成個溫泉，但係撞啱天氣回暖，浸咗一陣泥漿溫泉有啲頭暈，頂唔順要即刻上番水。」當地除了海產新鮮好味，Toby還試了一杯永世難忘的飲品，她笑說：「有日去村落拜會酋長，佢哋沖咗一杯好似泥水咁嘅歡迎飲品，味道好怪，味道真係一世難忘。」
文：影視組