陳秋霞切乳抗癌不准流一滴淚

70年代唱而優則演的陳秋霞去年患上乳腺癌第二期，身在吉隆坡的她親口證實已接受手術切除左邊乳房及腫瘤，對於保不住乳房，她接受長途電話訪問時笑說：「唔保啦，60歲仲保乜鬼，我係全世界最唔貪靚嘅明星。」亦沒打算重建乳房，因為已經習慣。她透露做手術後，於四個月內進行了八次化療：「我當自己100%痊愈，精神到打得老虎！」上月她就以一頭清爽銀白短髮亮相，偕姨甥鄺祖德到紅館捧場睇許冠傑及譚詠麟的演唱會，精神飽滿。

擔心遺傳驗基因

秋霞詳述發現患病經過及抗癌過程：「最好彩冇擴散到淋巴，個腫瘤有3.7乘2點幾厘米咁大，照咗出嚟醫生話好惡。」堅強的她坦言得知確診患癌後，還懂得與姨甥女兼主診醫生鄺靄慧開玩笑：「今次我唔做你個代言人都唔得啦！」她出奇地樂觀，叮囑自己要堅強：「我唔會為呢個病流一滴眼淚，只係瞓喺手術枱上驚咗一下，嗰陣喺心裏面唱歌。」她自爆當日是自行步入手術室，手術前、後都有與醫生、麻醉師等自拍，接受長達三個多小時的手術時，更敷上透明面膜，她笑說：「唔好嘥，我仲搽埋Handcream（潤手霜）。」

陳秋霞病愈後專程捧場，並到後台與許冠傑敍舊。	病愈的陳秋霞偕姨甥鄺祖德睇騷，留有一頭銀白短髮。	陳秋霞捧場唱兩嘴，當時譚詠麟及許冠傑都不知道其病情。

問到患病期間可有作最壞打算？她坦言沒想過會死，但早於10年前已立遺囑：「好記得喺2007年7月我去西藏做義工，因為唔知高山症或者有咩差池令生命有危險，唔理三七廿一叫律師搞掂咗，咁就冇後顧之憂。」她坦言最擔心是乳腺癌細胞遺傳給三個女兒，所以手術後第一時間驗血做了遺傳基因檢查：「最好消息係我呢啲癌症基因冇遺傳到畀佢哋。」談到化療過程，她坦言沒想像中痛苦：「因為我啲癌細胞惡啲，本來可以攤長嚟打，但我喺四個月打晒，又過晒關。我冇嘔過，但條脷係苦，面又爆瘡，手腳、指甲又有黑斑，好彩依家又退番。」她表示往後10年都要服藥抑制癌細胞，有感今次是一個警惕，並呼籲大家要注意健康。

睇騷精神飽滿

其姨甥歌手鄺祖德（Enrico）月前誠邀病愈的她來港欣賞好友譚詠麟及許冠傑的演唱會，Enrico昨日受訪時透露阿姨的近況：「好番晒啦，之前佢甩晒啲頭髮，依家都生晒啲銀白真髮。」他又笑言阿姨不似病人：「就算做化療，佢都冇瘦過，冇嘔、冇口爛，仲好好胃口，好精神，剛剛好番仲周圍飛去做嘢！」並指擔任主診醫生的姐姐有叮囑阿姨要小心身體：「唔可以當自己冇病囉！」

文：音樂組