金剛窮到燶借錢度日

藝人金剛於台灣讀至高中畢業後任職過髮型屋、便利店，之後機緣巧合於客人介紹下，2002年加入台灣娛樂圈，2009年無綫到台灣找演員擔任TVB8主持，金剛才轉戰香港，雖然他有份做「獎老」的遊戲節目《獎門人》及與阮小儀拍檔的《街坊廚神》做了一段時間，亦吸納不少人氣，但原來金剛於約三年前工作量一落千丈，底薪不多的他，一年接得一個騷，更需向好友借錢度難關。

「知我冇錢，請我食飯」

金剛接受專訪時，說到三年前的工作及經濟狀況，頓時收起搞笑、調皮一面，他認真地說：「當時喺無綫底薪唔多，收入始終唔會好豐厚，嚴格嚟講大家都知底薪係少，要靠接Show，但之前有一年我只係接到一個Show，成個月冇嘢做，死啦！講真，我唔係好多積蓄，嗰陣係搵辦法自己慳錢，衫又冇去買，嗰排真係着嚟着去都嗰幾件。」當時經濟拮据，問他有否向圈中好友借錢，金剛不諱言：「有！好多圈內朋友都幫過我，初時覺得呢行冇乜情義，但呢啲幫過我嘅人，真係『在心中』。（有邊個？）三哥（苗僑偉），佢照顧咗我好多，實際上係乜唔好講喇！小儀（阮小儀）都有，佢知我嗰陣冇乜錢，知我困難，成日請我食飯，好感動。」問到困境時家人有否給他壓力，金剛說：「冇！屋企人好好，佢哋知我有困難都話唔緊要，照顧好自己先，我都好感動。」

雖然於無綫賺錢不多，但金剛坦言與無綫關係相當良好：「冇話反面走，只係大家嘅理念唔同，始終大公司好多嘢要配合。」金剛今年6月跟合作十年的無綫約滿，7月加盟王祖藍公司旗下，向來孝順的他，為了照顧父母，已搬返台灣，有工作時便飛中、港，實行中港台三邊走。說到之前有傳曾志偉與無綫不和，而金剛是因志偉而離開無綫，金剛說：「新聞點寫我冇得控制，志偉係我嘅恩師，香港有金剛，真係要多謝佢，佢幫咗我好多。我依家喺台灣住，一方面我係想多啲時間照顧父母，二來香港消費真係好貴。我喺台灣同一個幕後朋友都搞咗間娛樂公司，啱啱開始啟動。」

轉新公司後，金剛接了不少大陸綜藝節目，亦拍攝多部電影，說到搵多了錢，他笑說：「唔係好多，大家有情有義嘛！」不少藝人跟祖藍「搵食」都想在內地市場分一杯羮，金剛說：「邊度都冇所謂，我要求嘅係自由度。」問他目標是甚麼時，他搞笑說：「叫祖藍喺隔籬送個單位畀我，一層就滿足！同佢一模一樣大就夠，呢個係我目標！（仲距離幾多?）要問佢（祖藍）哈哈！」昔日參演的角色都是說半鹹淡廣東話，問金剛有否想演的其他角色時，他開玩笑說：「我真係想做嗰啲有好多女朋友，個個身材不得了嗰啲！」

「身材好樣靚個個都想」

問金剛與前女友蕊蕊分手後有否拍拖，他說：「一個都沒有，慢慢睇！可能係我唔啱談戀愛，我唔抗拒拍拖，會多識朋友，相處吓先。（揀女友條件唔同咗？）身材好、樣靚個個都想要，但係最緊要係性格，要成熟、獨立。（要求高？）希望啫！」

眾所周知，金剛是「識食」之人，戒煙已一年的他體重暴升了30多磅，現時近200磅的他坦言，最巔峰時體重高達210多磅，更說：「之前我做過身體檢查，醫生話我有少少脂肪肝，脂肪肝嚴重啲係會肝硬化。（你食得太好？）所以我依家食嘢盡量清淡啲。」

小儀先鬧後幫

對於曾助金剛解困，阮小儀說：「嗰時拍《街坊廚神》，有時唔使拍或者拍完後大家食飯，以前佢食得好豪，但有段時間怪怪哋，唔係好食，唔嗌佢又唔會出嚟，咪知知哋（經濟唔好），我呢啲婆仔性格，通常係鬧佢先：『抵你啦，成日買名牌。』因為佢豪嘅時候，成日喺水貨舖買名牌，佢就話冇買好耐，着對鞋咁耐都係呢對，佢咁講，我唔多唔少估到。（所以成日請佢食飯？）都算，咪唔使佢夾錢囉！」

文：影視組

攝：司徒國榮

場地：隆堡麗景酒店