里奧勒度狄卡比奧不愧為「No.1模界殺手」，前日一個時裝雜誌活動有三個索模舊愛同場已經好養眼，而里奧仔當晚孖新緋聞女Lorena Rae夜蒲，正當大家以為有新歡上場，他離場時卻突然與前女友Toni Garrn十指緊扣證復合，堅係多情又奇情！
時裝雜誌《Harper's Bazaar》上周五於紐約舉行派對，不少索模與女星盛裝撐場，包括43歲的「里奧仔」里奧勒度狄卡比奧（Leonardo DiCaprio）三位金髮名模舊愛，以拍拖時序依次排行，分別為25歲的德國模Toni Garrn、27歲美國模Kelly Rohrbach與25歲丹麥模Nina Agdal，三女未有埋身合照，Toni玩中性打扮真空上陣，Kelly則以野性印花透視裙示人，今年5月剛「卸任」撇低「里奧女」銜頭的Nina則瞓身騷胸晒腿，各出「吸睛」大法！同場另有真人騷女星Kim Kardashian谷巨胸與奀模Lenya Bloom透點兼露下身「神秘黑三角」部分位置，為搶風頭搏到盡！
而里奧仔同晚亦現身紐約，與23歲嫩模Lorena Rae去夜店，不過玩到翌日凌晨5時離場時，里奧仔被拍到竟然與分手三年的Toni十指緊扣離開，似乎Toni去完雜誌活動就秘密轉場，至於Lorena就與友人頹爆回家，未知場內有否發生「前度」撼「新歡」的戲碼？而里奧仔與Toni見到記者後即時分開行，但有指二人最後都再聚頭，約埋齊齊返歸，似乎堅翻撻成功！
文：外娛組