祖兒紅唇 歌迷唔敢錫

天后容祖兒昨日因路上發生交通意外引致擠塞，令她姍姍來遲，不過現場數百市民及歌迷超熱情，當她出現時全場尖叫。祖兒與歌迷玩遊戲，有身高6呎3的男歌迷表現投入，又唱又扮可愛，氹得祖兒開懷大笑。之後祖兒要為兩位歌迷塗紅唇，再在她的相片上留唇印，其中一位男歌迷未有將紅唇印在祖兒照片的嘴部，問他為何「唔錫嘴」？男歌迷竟大膽說：「咁神聖梗要留畀師兄啦！」令現場歌迷歡呼大叫，搞到祖兒嚇到退後一步，並作狀拍打歌迷，她大聲笑道：「有刺客！拖佢出去。」但最後台下歌迷選「刺客男」勝出遊戲，祖兒笑說：「你好嘢，算啦，有咩歌迷就有咩偶像，我實會報仇嘅！」

祖兒受訪時大讚6呎3男歌迷可愛，亦很有表演欲，問到歌迷還是男友劉浩龍可愛？她即笑指傳媒最可愛。至於有否被「刺客男」的言論嚇親？祖兒笑說：「我都唔知點解，唔知邊個教佢咁講，好多事。（師兄有冇咁佻脫？）我佻脫啲，佢邊有。」

「唔講佢講邊個？」

看來歌迷已接受師兄？祖兒坦言：「實有鍾意同唔鍾意。」至於是否覺得歌迷比以前接受？她說：「唔係點啫？都見到你哋成日一齊挹挹揚揚，歌迷唔講佢講邊個？搞吓氣氛啫！」提到歌手孫耀威曾指有歌迷不喜歡其太太陳美詩，祖兒表示明白歌迷反應是好直接，所以如果能接受是好事，自己亦會好開心。另外，她指演唱會的DVD銷情反應理想，很久沒聽過要在唱片舖預訂。 　　　

文：音樂組

攝：秦健輝