陳意嵐露肉要講原則
影星陳意嵐身材惹火，但入行前原來是個大肥妹，積極減肥下雖然成功收身，卻搞到身體變差，試過半年沒有「月事」！她又認為行性感要着重意識，並非一味露肉。
陳意嵐（Tarah）以性感形象進軍影壇，最為人所共知的是首次試鏡就全裸上陣，但她不想被定型為性感女星，希望逐漸轉型：「有做旅遊飲食節目主持，都好鍾意，依家籌備拍整嘢食節目。」她又自爆以前是肥妹一名，努力減肥才練成火辣身材，卻因此搞壞身體，故現時很注意養生：「半年前開始讀中醫藥膳，從飲食開始保養自己，之前減肥令身體差到停經，半年都冇嚟，一嚟就嚟兩個月都唔停，生理亂晒！仲試過太瘦唔舒服入院，當時個人容易暈，血壓過低，醫生要我增肥十幾磅，但做呢行重十幾磅係冇辦法接受，當時醫生唔畀我落床，又要吊鹽水，身體差到負擔唔到，所以依家做運動保持身材，但我又鍾意食嘢，所以要攞個平衡。」
開網店做老闆娘
問到要在影壇突圍是否有難度，要大膽豁出去？Tarah說：「我好豁出去啦，第一套戲都冇衫着，但我覺得性感唔係喺件衫度，反而喺意識度。如果要我拍成班女仔唔着衫沖涼係好合理，我可以做到，但如果劇情無厘頭要意淫，或者着住衫無端端自摸，流露放蕩嘅表情，對我嚟講反而衝擊到底線，底線未必喺件衫度，要喺合理劇情下我可以接受。」她又表示最想做喪屍或殭屍角色：「次次收劇本Offer都係性感女，想做啲以外嘅嘢，但好有難度，因為啲人要性感就會諗起你，但其他角色未必諗到搵你做。」
此外，Tarah透露將榮升老闆娘，與朋友合資搞網店：「都籌備咗半年，主要代購同埋賣飾物同衫，我鍾意旅行，見到靚嘢就會入好多貨。」
文：名人組
髮型：Will@Salon Amarone
化妝：Imp@ImpMakeupArtistry
服裝：852ShoppingsBuddies