姚子羚男友陪練功：搵佢做沙包

藝人姚子羚（Elaine）在無綫熱播劇《同盟》中與拍檔陳山聰譜出「羅密歐與茱麗葉式」的淒美戀曲，在兩大家族中為愛情而掙扎。她坦言山聰戲裏戲外都非常錫她，十足十溫柔體貼的暖男：「佢每日買咖啡都預多杯畀我！」提到戲中與山聰咀戲連場，會否擔心男友呷醋，Elaine笑說：「佢同我拍咀戲之前已經咀咗我男友！有次食飯佢兩個飲咗少少酒，山聰無啦啦話錫啖先，同男友錫完之後拍劇先錫我，兩個麻甩佬做埋啲咁嘅嘢好好笑！」

結婚未係時候

除了親密場面多，Elaine在劇中亦經常打到飛起，自嘲「打得少」的她坦言着高踭鞋拍打戲最具挑戰性：「一踢出去就好驚個踭篤親人！有場戲要喺車廂打，全程半踎狀態，架車又冇冷氣，都幾辛苦。」自言打到雙腳瘀晒：「有場戲完咗之後發現手肘同腳都紫晒色，山聰知道咗都好心痛。（男友再心痛啲？）佢冇嘢喎！佢自己做運動都做到損晒。」她又指男友主動鞭策要求做得更好，還陪她練功：「佢做沙包畀我打就最好啦！」

姚子羚與陳山聰激咀連場，幸好男友未有打爛醋埕。	放大圖片	姚子羚指男友主動陪練打，認真「廿四孝」！

問到與男友何時拉埋天窗？Elaine雖表示順其自然，暫未有計劃，但承認兩人朝着這目標進發：「如果大家都冇意思，就唔會行到今時今日啦！結婚都係人生必定要做嘅嘢，但未係呢個時候。」

文：影視組

攝：張福宏

化妝：Henry Li

髮型：Taylor Wan@ Hair Corner

服裝：S.Nine by Susanna Soo