李佳芯被張振朗揸Pat：撞鬼咁！
李佳芯和張振朗在劇集中有不少床戰場面，指當時勁尷尬的張振朗自爆有打對方Pat Pat之餘，還要出「龍爪手」揸多一下，認真「落力」！而李佳芯則笑指自己當撞鬼：「唔記得有咩係掂到、有咩掂唔到！」
藝人李佳芯（Ali）和張振朗在無綫熱播劇集《踩過界》中分別飾演法官和私家偵探，兩人不但在劇中擦出愛火，Ali更為被控謀殺的張振朗放棄法官尊貴身份，「踩過界」做大狀幫對方辯護，認真有情有義。張振朗坦言最感動的一場戲是Ali探望被羈押的他：「我見到佢眼濕濕入晒戲，我都入晒戲，之後講到我咀佢，我好鍾意嗰場戲，當然係除咗咀嗰方面。」
提到兩人在劇中不乏「激戰」場面，張振朗說：「有啲尷尬，有一下導演叫要我拍佢Pat Pat，我都諗咗陣，到我拍完佢（導演）仲話唔夠狠，要我揸多一下。」Ali則說：「我都唔記得有咩係掂到、有咩掂唔到！撞鬼咁！（有冇睇番有冇掌印？）咁又冇！」
眼神滲「姣味」
提到有不少網友「讚」Ali眼神滲出「姣味」，她笑指其實是雙眼發光：「真正嘅Ali見到鍾意食嘅嘢都會雙眼發光！」問張振朗是否認同網友睇法？他反而覺得Ali入戲時似足法官咁嚴肅：「反而係我對佢單眼！（你成日同啲女仔單眼？）係啲女仔同我單眼，但係我鍾意被動啲、乖啲、斯文啲。（緋聞女友陳芷尤係呢類？）我都相信佢都好乖同好斯文嘅！」
文：影視組
攝：吳文聰
服裝：N12H、reve_world（李佳芯）
造型：Katie Dyus（李佳芯）
電單車：Ducati Hong Kong