江若琳禁男友亂入求婚

歌手江若琳（Elanne）前日忙於為即將舉行的演唱會進行綵排，表示24小時都不夠用，她更自爆上星期緊張到日日失眠，幸好「生煎包王」男友蕭潤邦（Oscar）鬧醒她，她說：「有一晚我瞓唔着打畀佢，佢就開解我到朝早6點，佢話『其實一件咁開心嘅事，天重新畀番個演唱會你，你係應該好好去享受，而唔係變成壓力』，所以佢依家每日都逼我，一定要有一、兩個鐘畀自己放鬆，做啲唔關演唱會嘅事，用咗呢個方法之後我好咗好多。」

預告大騷舞技

講到演唱會歌衫，Elanne笑言會有少少性感：「極其量只係畀個背脊大家睇。（係咪男友唔畀你騷前面？）唔係，其實我背脊同前面冇乜分別啫！」她亦透露今次會唱別人的歌，例如同是2007年新人的歌，他們到時亦會以特別方法出現。她預告會大騷舞技：「係Party感覺。（會唔會有高難度動作或跳辣身舞？）會有一Part好有驚喜，係我從來未跳過嘅舞，可能係跳啲深情或有故事性嘅舞。」

江若琳講明唔係唔接受騷上求婚喎，Oscar要識做啦！

江若琳近來日日為演唱會綵排，更緊張到冇覺好瞓。

「踩我場想死呀？」

問到可會期待男友屆時在台上求婚？Elanne即笑言：「絕對唔會，大家放心，一定唔會，佢咁做我同佢反面！踩我場想死呀？（你唔覺得咁做好有驚喜？）我覺得呢件事兩個人去實行就OK，有一種浪漫係我哋自己知，而唔係擺上演唱會。（唔接受喺騷上求婚？）唔係嘅，但如果玩啲咁嘅嘢我會好失控，大家係買飛入嚟睇我唱歌，而唔係睇求婚。」她亦澄清與男友已秘密訂婚的傳聞，表示兩人戴的只是情侶戒指。另外，講到好友葉文輝（啤梨）入紙與未婚妻註冊結婚，她笑言：「佢都應該啦，搞咗壇大龍鳳，佢簡直成為指標。（想快啲到你結婚？）隨緣啦，同埋呢啲都唔係我決定。」

文：音樂組

攝：劉斌