譚耀文化身Rambo駁火子彈擦唇見紅
藝人譚耀文（阿譚）日前為新片拍攝槍戰戲，「Rambo上身」的他被誤傷嘴唇流血仍面不改容，堅持繼續拍攝，台前幕後均讚他專業。他笑言電影公司有幫自己買保險，叫大家放心，又指計劃花多點時間在港開工，可多陪一對仔女。
阿譚、梁琤、陸詩韻、唐文龍及樂團主音兼盧巧音老公蘇浩才（Sammy）等，日前在將軍澳為黃永峰監製的新戲《辣警霸王花2》拍攝槍戰場口。當天遇正打風前的酷熱天氣，台前幕後到場不久已大汗疊細汗，相當辛苦。為營造逼真的槍林彈雨效果，電影公司事前已向相關部門申請，以真槍發射空彈拍攝「實戰」場面。
親自為角色命名
導演一聲令下，手持M117型號長槍的阿譚即「Rambo上身」，偕唐文龍等與「匪徒」Sammy駁火，頓時槍聲四起，期間子彈殼及玻璃碎片橫飛四散，意外擊中了當時全神貫注投入拍攝的阿譚嘴唇，為免影響進度，他忍痛完成餘下的拍攝，直至停機後才被發現唇部滲血，工作人員即為阿譚治理傷口，並大讚他專業。阿譚受訪時卻笑說：「好小事啫，冇大礙。大家放心，電影公司有幫我買保險。」
阿譚相當重視今次的演出，希望凡事力臻完美，細節如角色名字亦有提供意見，他打趣說：「我好鍾意呢個角色，連角色名都係我改嘅，事關編劇起初冇交代我叫乜名，淨係話我係『譚Sir』，但有場戲講要介紹自己，我就改咗叫『譚家明』，一嚟我好鍾意哥哥個『明』字（譚耀文哥哥譚耀明），二嚟譚家明導演執導嘅《父子》好經典，借用吓導演個咁靚嘅名。」談到今次飾演正氣的警長，與以往演慣的奸角可謂截然不同，阿譚坦言最緊要觀眾喜歡：「嚟緊接咗幾部戲，會花多啲時間留喺香港，最開心係可以多啲陪對仔女。」
文：影視組