陳山聰突襲街市變師奶殺手
藝人陳山聰於新劇暖男角色非常入屋，日前樸素打扮突襲街市，引來街坊及檔販駐足圍觀，頓時成為師奶殺手！有菜販不斷向山聰言語上「抽水」，既誤當姚子羚為其現實的另一半，又追問劇情及拍攝槍戰戲細節，令山聰哭笑不得。
陳山聰於無綫劇集《同盟》演鮑起靜養子，為捍衞家族及「母親」安全而與敵人槍戰連場，非常型爆，相反於愛人姚子羚面前又顯盡細心，其暖男形象深入民心，於前晚播出的劇情中，山聰再次成功保護鮑起靜，加上形象令人煥然一新，網民均一致認為山聰絕對有機會問鼎今屆頒獎禮「最佳男配角」。而將於下月舉行的新加坡「星和無綫電視大獎2017」，山聰已憑該劇獲男配角、螢幕情侶及喜愛角色等提名。
菜販心心眼
其實現實中的山聰亦是暖男，日前趁不用開工，即單拖突襲街市，準備買餸下廚與女友Apple撐枱腳。見他步入街市後便一支箭走到海鮮檔，並熟練地落手落腳挑選，期間與老闆有講有笑，有市民見暖男山聰出現，即紛紛把握機會玩自拍，山聰也一一滿足他們，又邊行邊與街坊揮手，及後轉戰菜檔，一名女菜販甫見山聰光顧即心心眼，既輕拍他手臂又一輪嘴發問：「劇入面個老婆係咪真係你老婆？你開槍啲子彈飛晒出嚟，又咁多血，真係咁o架？之後你會點o架？哎呀！睇到我不知幾咁緊張！」山聰忍不住笑說：「你講姚子羚？佢梗係唔係我真嘅另一半啦！哈哈！開槍戲係有加入特效，你都睇得好投入喎！」
「唔使求婚都得」
事後山聰表示對角色受歡迎大感高興，他說：「多謝大家咁支持套劇，呢排去親買餸都畀人追問劇情，但保持神秘梗係要拉鏈嘴啦！」談到無論劇中或是現實生活均為暖男，山聰笑不攏嘴指平日也愛下廚，主打清淡菜式：「我唔係好用油，多數係蒸同焗，有時喺公司見到李家鼎都會同佢偷師，問吓煮食嘅嘢，女友都識煮，但佢煲湯叻啲。（依家生活同結婚係咪冇分別？）呢個年代係講共同生活，當然一紙婚書對女仔都緊要，我哋有晒共識，好快，但未求婚，相信唔使求都得，不過我心入面都有啲計劃，會做啲浪漫嘢，但要睇時機。」
文：影視組